පවතින අවාසනාවන්ත තත්වයෙන් රට මුදා ගැනීමට ඇති ලොකුම බාධාව රාජපක්ෂ පවුල තවදුරටත් බලයේ රැඳීසිටීම බව කොළඹ අගරදගුරු මැල්කම් කාදිනල් රංජිත් හිමිපාණන් පවසනවා.
ඒ, අගරදගුරු මැදුරේදී ඊයේ (5) පැවති මාධ්‍ය හමුවක් අමතමින්.
පවතින තත්වය යටතේ තවදුරටත් බලයේ රැඳීසිටීමට ජනාධිපතිවරයාට සහ රජයට සදාචාරාත්මක අයිතියක් නොමැති බැවින්, රටවැටී ඇති ඛේදනීය තත්වයේ වගකීම බාරගෙන, තනතුරුවලින් ඉල්ලා අස්වී, රටේ අනාගතය ජනතාවට භාරදෙන්නැයි තමන් ඉල්ලා සිටින බවයි කාදිනල්වරයා සඳහන් කර සිටින්නේ.
ඉන්පසු ජනතාව පතන ව්‍යූහාත්මක දේශපාලන වෙනස ඇතිකර ගැනීම සඳහා අන්තර්කාලීන සර්ව පාක්ෂික රජයක් පිහිටුවා ගත හැකි බවත් එම රජය තාක්ෂණික සහ විද්වත් කමිටුවක් හරහා විශේෂඥ උපදෙස් ලබාගනිමින් රටේ පවතින ගැටළු ඉක්මනින් විසඳීමට කටයුතු කළ යුතු බවත් ඔහු පවසනවා.
රටේ තත්වය යහපත් වූ වහා මහ මැතිවරණයක් පැවැත්විය යුතු බව ද කී අගරදගුරුතුමෝ දේශය මෙම තත්වයෙන් මුදා ගැනීමට පෙරමුණ ගන්නැයි විපක්ෂයේ සියලු දේශපාලන නායකයින්ගෙන් ඉල්ලා සිටින බවත් රට පත්ව ඇති උග්‍ර අර්බුදකාරී, තත්වයට සෘජුවම වගකිව යුත්තේ ජනාධිපතිවරයා සහ රජය පසුගිය වසර 2 1/2 ක කාලය තුළ ගත් අදූරදර්ශී සහ අත්තනෝමතික තීරණ බව පිළිගත යුතු බවත් මැල්කම් කාදිනල් රංජිත් හිමිපාණන් පෙන්වා දෙනවා
නව අගමැතිවරයා පත්වීමත් සමඟ ජනතාව තුල සුළු වශයෙන් හෝ ඇතිවූ අපේක්ෂාවන්ට ඉඩදෙමින් ටික කලක් නිහඬව සිටිය ද දැන් උදාවී ඇති තත්වය අනුව ආගමික නායකයෙකු සහ වගකිව යුතු පුරවැසියකු ලෙස තමාට නිහඬව සිටිය නොහැකි බවත් අගරදගුරුතුමාණන් අවධාරණය කරනවා.
