හෝමාගම, පිටිපන පිහිටි ඉඩම් කොටස් දෙකක් (02) සීමාසහිත ජාතික ව්‍යාපාර කළමනාකාරිත්ව විද්‍යායතනය (NSBM) වෙත ලබා දීම සඳහා කැබිනට් මණ්ඩල අනුමැතිය හිමි වී තිබෙනවා.
හෝමාගම නගර සංවර්ධන සැලැස්ම යටතේ “දැනුම් කේන්ද්‍රීය නගරය” සංකල්පයට අනුව විද්‍යා හා තාක්ෂණ අංශ දියුණු කිරීම ප්‍රමුඛ කොට ගෙන ඒ සඳහා අවශ්‍ය බිම් කොටස් වෙන් කර දීමේ අරමුණින් මෙම යෝජනාව ඉදිරිපත් කර තිබුණා.
ඒ අනුව, නාගරික සංවර්ධන අධිකාරියට අයිති හෝමාගම, පිටිපන පිහිටි මාහේනවත්ත නමැති අක්කර 237ක ඉඩමෙන් කොටස් දෙකක් මෙලෙස ලබා දීමට තීරණය කර තිබෙනවා.
එම ඉඩමින්අක්කර 14 රූඩ් 03 පර්චස් 12.8ක් වූ ඉඩම් කොටසක් ජාතික ව්‍යාපාර කළමණකාරීත්ව විද්‍යාතනයේ II අදියර ඉදි කිරීම සඳහාද තවත් අක්කර 20ක පමණ බිම් කොටසක් එහි III අදියර ඉදි කිරීම සඳහාද ලබා දීමට නියමිතයි.
ඒ අනුව, රජයේ තක්සේරුකරුගේ තක්සේරු වටිනාකම අය කිරීමට යටත්ව, දිගුකාලීන බදු පදනම මත ජාතික ව්‍යාපාර කළමනාකාරිත්ව විද්‍යායතනය වෙත ලබා දීම සඳහා නාගරික සංවර්ධන හා නිවාස අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර තිබෙනවා.
