එක්සත් ජාතීන්ගේ ආරක්ෂක කවුන්සිලය ඇෆ්ගනිස්ථානයේ සිවිල් වැසියන් ඉලක්ක කර ගනිමින් අඛණ්ඩව සිදු වන දරුණු ත්‍රස්තවාදී ප්‍රහාර හෙළා දැක තිබේ.
අඛණ්ඩව සිදු වන ප්‍රහාර සඳහා සම්බන්ධ ප්‍රහාරකයන්, සංවිධායකයින්, මූල්‍ය සපයන්නන් මෙන්ම ත්‍රස්තවාදයට අනුග්‍රහය දක්වන්නන් සියල්ලන් ඒ සඳහා වගකිව යුතු බව එම කවුන්සිලය අවධාරණය කර ඇත.
එම කවුන්සිලය නිකුත් කර ඇති නිවේදනය මගින් අප්‍රේල් 29 වන දින කාබුල්හි කලීෆා සාහිබ් දේවස්ථානයට එල්ල වූ ප්‍රහාරය දැඩි ලෙස හෙළා දැක ඇති අතර එම ප්‍රහාරයෙන් අවම වශයෙන් පුද්ගලයින් 30 දෙනෙකු මිය ගොස් තවත් බොහෝ දෙනෙකු තුවාල ලබා තිබේ.
රාමදාන් මාසය තුළ ඇෆ්ගනිස්ථානය පුරා ආගමික සුළුතර ප්‍රජාවන් ඇතුළු සිවිල් වැසියන්ට සහ සිවිල් යටිතල පහසුකම්වලට ප්‍රහාර රැසක් එල්ල විය.
මෙම පිළිකුල් සහගත ත්‍රස්තවාදී ක්‍රියාවන්ට වගකිව යුතු පුද්ගලයන් නීතිය ඉදිරියට ගෙන ඒමේ අවශ්‍යතාවය අවධාරණය කර ඇති එක්සත් ජාතීන්ගේ ආරක්ෂක කවුන්සිලය සියළුම රාජ්‍යයන් තම වගකීම්වලට අනුකූලව මේ සම්බන්ධයෙන් සහයෝගයෙන් කටයුතු කළ යුතු බව ද අවධාරණය කර තිබේ.
