පාර්ලිමේන්තු මන්ත්‍රීවරුන් සඳහා වාහන ආනයනය කිරීම සිදුනොවන බව කෘෂිකර්ම අමාත්‍ය මහින්දානන්ද අලුත්ගමගේ මහතා පවසයි.
මේ මොහොතේ වාහන ආනයනය නොකළ යුතු බව සියලු දෙනාගේම තීරණය වූ බවත් එබැවින් අදාළ වාහන ආනයනය කිරීමේ යෝජනාව තාවකාලිකව අත්හිටුවීමට රජය තීරණය කළ බවත් අමාත්‍යවරයා පවසනවා.
මෙහිදී වැඩිදුරටත් අදහස් දැක්වූ අමාත්‍යවරයා,
“මේ වාහන ගැන සියලු දෙනාගේම තීරණය වුණේ මේ මොහොතේ වාහන ගෙන්විය යුතු නෑ කියන එක. වාහන ගෙන්වන තීන්දුව ගත්තේ කථානායකතුමා විසින්, මේක පාර්ලිමේන්තු මන්ත්‍රීවරුන්ට වාහන බලපත්‍ර දෙන්න ඕනේ. එල් සී විවෘත කරලා තියෙන්නේ ගිලන් රථ සඳහායි.”
කෙසේ වෙතත් වාහන ආනයනය පිළිබඳව ඊයේ (14) දිනයේදී රාජ්‍ය අමාත්‍ය නාලක ගොඩහේවා මහතා පළ කළේ මීට වෙනස් අදහසක්.
අමාත්‍යවරයෙක් හට වාහන 3කට හිමිහම් ඇති බවත් ආනයනය කරන වාහනයක් ලබා ගැනීමේ කිසිඳු වරදක් නොමැති බවත් රාජ්‍ය අමාත්‍යවරයා ප්‍රකාශ කළ අතර දේශපාලඥයන් දෙස වෛරයෙන් නොබලන ලෙසත් ඔහු ජනතාවගෙන් ඉල්ලා සිටියා.
මේ අතර අද (15) පැවැති කැබිනට් තීරණ දැනුම්දීමේ මාධ්‍ය හමුවට එක්වෙමින් කැබිනට් ප්‍රකාශක අමාත්‍ය කෙහෙලිය රඹුක්වැල්ල මහතා පවසා සිටියේ වාහන ආනයනය කිරීම සඳහා විවෘත කර තිබූ ණයවර ලිපි සම්බන්ධයෙන් අදාළ මූල්‍ය සමාගම් සමග සාකච්ඡා කොට ඒවා අවලංගු කිරීමට මුදල් අමාත්‍යංශය පියවර ගෙන ඇති බවයි.
“ප්‍රතිපත්තිමය තීන්දුව එක්කම සෑම දෙයකම ක්‍රියාවලියක් තියෙනවා. ණයවර ලිපි විවෘත කිරීමේදී පාර්ශ්ව තුනක් එකඟතාවයකට එනවා. භාණ්ඩාගාරය, බැංකුව සහ නිෂ්පාදකයා. මේ පාර්ශ්ව 3ම එකඟ වුණා මෙය අවලංගු කරන්න.”
සබැඳි ලිපි..
