ඉරානය හමුවේ අවසන් මොහොතේ ලද පරාජය හේතුවෙන් වසර 64 කට පසු පාපාන්දු ලෝක කුසලාන තරගාවලියකට සුදුසුකම් ලැබූ වේල්සයේ ලෝක කුසාලාන සිහිනය පළමු වටයෙන්ම බොඳ වන ලකුණු පහළ වී තිබෙනවා.
Roozbeh Cheshmi 98 වැනි මිනිත්තුවේදි සහ Ramin Rezaeian 101 වැනි මිනිත්තුවේදී රැස් කළ ගෝල දෙක ඉතිහාසයේ පළමුවරට ලෝක කුසලානයක පිිලිමලුන් පිටුදැකීමේ වටයට සුදුසුකම් ලැබීමට ඉරානයට වැඩි අවස්ථාවක් උදාකර දුන්නා.
තරගයේ 86 වැනි මිනිත්තුවේදී Medhi Taremi හට අනතුරුදායක ලෙස අභියෝග කිරීමේ වරදට වේල්ස් දැල් රකින ක්‍රීඩක Wayne Hennessey තරගයෙන් පිටියෙන් ඉවත් කිරීමට (red card) විනිසුරු තීරණය කළා.
ඒ සඳහා වීඩියෝ පුනරූපන සහය යොදා ගත් අතර එම තීරණය වේල්සයේ ජයග්‍රහණය පිළිබඳ අපේක්ෂා බොහෝ ඈතට විසි කළ තීරණයක් වුණා.
ලෝක කුසලාන පාපන්දු තරගාවලියක දැල් රකින ක්‍රීඩකයෙකුට රතු කාඩ් පතක් ලැබුණේ ඉතිහාසයේ තෙවැනි වරටයි.
ඉරානය සහභාගීවන තරගවල තවත් සුවිශේෂි අවදානයට ලක්වන අවස්ථාවක් වන්නේ ජාතික ගීය ගායනා කිරීම වන අතර එංගලන්තය සමග පළමු තරගයේදී ඔවුන් එරට ආණ්ඩු විරෝධී උද්ඝෝෂකයින්ට සහය පල කිරීමක් ලෙස ජාතික ගීය ගායනා කිරීමෙන් වැලකුණා.
නමුත් වේල්සය සමග තරගයේදී ඉරාන ක්‍රීඩකයින් ජාතික ගීය ගායනා කළද ප්‍රේක්ෂකයන් එහිදී හු හඬ නගමින් ඊට විරෝධය පළකරනු දක්නට ලැබුණා.
ඉරානය මෙම ජයග්‍රහණය ලැබුවේ එංගලන්තයට එරෙහිව පළමු තරගය 6 – 2 ක් ලෙස දරුණු පරාජයකින් අනතුරුව වීමත් විශේෂත්වයක්.
මෙම පරාජයත් සමග තරගාවලිය තුල තවදුරටත් රැඳී සිටීමට නම් ලබන අඟහරුවාදා එංගලන්තය සමග පැවැත්වෙන තරගය ජය ගැනීම වේල්සයට අනිවාර්ය වනවා.
ඉරානයට මෙම කාණ්ඩයේ ඊළඟ තරගය තිබෙන්නේ ඇමෙරිකාව සමගයි.
මේ අතර A කාණ්ඩයේ එංගලන්තය සහ ඇමෙරිකාව අතර පැවති තරගය ජය පරාජයෙන් තොරව නිමාවට පත් වුණා.
ඉරානය සමග දෙදිනකට පෙර පැවති තරගයේ දී මෙන් ආක්‍රමණශීලී ක්‍රිඩා විලාශයක් එංගලන්ත ක්‍රීඩකයින්ගෙන් දක්නට නොලැබුණු අතර Weston McKennie ට ලැබුණු පහසු අවස්තාවක් ගිලිහී ගිය අතර Christian Pulisic එල්ල කළ පහරක් ගෝල කණුවේ වැදී නතර වුණේ එංගලන්තයේ අවාසනාවටයි.
