ශ්‍රී ලංකාවේ ‘ක්‍රිප්ටෝ මුදල්’ භාවිතය ගනුදෙනු සඳහා නීත්‍යනුකූල නොවන බව ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතා පවසනවා.
නන්දලාල් වීරසිංහ මහතා අවධාරණය කර ඇත්තේ තවමත් ක්‍රිප්ටෝ මුදල් ශ්‍රී ලංකාවේ බහුල වශයෙන් භාවිත වන බවක් දක්නට නොමැති අතර එම මුදල් භාවිතයේ අවදානමක් පවතින බවයි.
ක්‍රිප්ටෝ මුදල්වල මුදල් ආයෝජනය කළ අයගේ මුදල් අහිමි වී පාඩු සිදුවී ඇති බවත් ඒවායේ මුදල් යෙදවීම හරහා ඇතැම් අය වංචාවලට හසුව ඇති බවත් මහ බැංකු අධිපතිවරයා පවසා තිබෙනවා.
මේ හේතුවෙන්, ශ්‍රී ලංකාවේ ක්‍රිප්ටෝ මුදල් භාවිතය සම්බන්ධයෙන් මහ බැංකුවේ අදාළ අංශ අධ්‍යයනය කරමින් සිටින බවද මහ බැංකු අධිපතිවරයා දැනුම් දී ඇති බවයි වාර්තා වෙන්නේ.
