මේ වන විට යුක්රේන ජාතික සංචාරකයින් 3000 ක් පමණ මෙරට රැදී සිටින බව රුසියාවේ හිටපු තානාපති උදයංග වීරතුංග මහතා පවසනවා.
ඔහු සදහන් කරන්නේ මාස 03 හා මාස 06 යන කාලයක් සඳහා පැමිණි යුක්රේන ජාතිකයින් විශාල පිරිසක් දකුණු පළාතේ වැලිගම, මිරිස්ස ප්රදේශ ආශ්රිත හෝටල්වල රැදී සිටින බවයි.
එමෙන්ම එම ප්රදේශවල රුසියානු සංචාරකයින්ද රැදී සිටින බැවින් ඔවුන් අතර ගැටුම් ඇතිවිය හැකි බව වීරතුංග මහතා පෙන්වා දෙනවා.
එබැවින් එවැනි ගැටුමක් ඇති වුවහොත් හෝටල් කළමණාකාරීත්වය මැදිහත්ව එවැනි ගැටුම් මැඩපවත්වන ලෙසට තමන් අදාළ හෝටල්වලට දැනුම්දුන් බව උදයංග වීරතුංග මහතා පවසනවා.
මේ අතර සංචාරක අමාත්යංශය පවසන්නේ යුක්රේන සංචාරකයින් 4,000ක් පමණ මේ වන විට මෙරට රැඳී සිටින බවයි.
ඔවුන් දින 30ක කාලයක් සඳහා මෙරටට පැමිණ ඇති බැවින් දින 30 කින් එම සංචාරකයින්ගේ වීසා කාලය අවසන් වීමට නියමිත බව සංචාරක අමාත්යංශය පෙන්වා දෙනවා.
එහෙත් යුක්රේනයේ පවතින යුද ගැටුම් හේතුවෙන් තවදුරටත් මෙරට රැඳී සිටිමට කැමැත්ත දක්වන සංචාරකයින්ට වීසා කාලය දීර්ඝ කිරීමට කටයුතු සලසාදෙන ලෙස අදාළ සංචාරක නියෝජිතයින්ට උපදෙස් ලබාදී ඇති බව සංචාරක අමාත්යාංශය සඳහන් කරනවා.
අදාළ වීසා කාලය අවසන්වීමෙන් පසු සිය රට බලා යාමට අවශ්ය සංචාරකයින්ට සෘජුව යුක්රේනයට ගුවන් ගමන් සිදුනොවන බැවින් වෙනත් රටවල් හරහා යළි සිය රටට යෑමට අවශ්ය කටයුතු සලසාදෙන ලෙස ද එම නියෝජිත ආයතන වෙත උපදෙස් ලබාදී ඇති බව සංචාරක අමාත්යාංශය වැඩිදුරටත් සඳහන් කළා.