ඇතැම් රාජ්‍ය නිලධාරීන්ගේ වැරැදි තීන්දු තීරණ නිසා රජයටත් ජනතාවටත් විශාල පාඩු සිදු වෙන බව නාගරික සංවර්ධන හා නිවාස අමාත්‍ය ප්‍රසන්න රණතුංග පවසනවා.
නිලධාරින් සිදු කරන එවැනි වැරදි නිසා අවසානයේ ජනතාවගෙන් චෝදනාවට ලක්වන්නේ දේශපාලඥයින් බව අමාත්‍ය පවසා සිටියා.
“2023 වසරේදී ආරම්භ කළ ඩත්තු ව්‍යාපෘති අද වෙනකන් අවසන් කරලා නෑ. මේ ගැන මහජනතාව වගේම නගර සභාවේ හිටපු මහජන නියෝජිතයන්ගෙනුත් මට පැමිණිලි ලැබිලා තිබෙනවා. ට්‍රැක්ටර් පහක් නගර සභාවට තියෙනවා. එයින් එක ට්‍රැක්ටරයයි අද වෙනකොට වැඩ කරන්නේ කියනවා. ඇයි ඉතිරි ට්‍රැක්ටර් හතර හදා ගන්න මේ වෙනකන් බැරි වුණේ.නිලධාරින්ගේ ප්‍රමාදය නිසා අද රජයට කොච්චර පාඩු සිද්ධ වෙනවද. සම්බන්ධිකරණ කමිටුවේ ගන්න තීන්දු තීරණ ගැන නිලධාරින් අහගෙන ඉන්නේ නෑ. ගන්න තීන්දු නිකන් කතා කරලා ගන්න තීන්දු නෙමෙයි. තීන්දු ගත් ලේඛන තියෙනවා. දිස්ත්‍රික් සම්බන්ධිකරණ කමිටුවේ අනුමැතිය හිමි වූ වහාම ක්‍රියාත්මක කිරීමට අවශ්‍ය ව්‍යාපෘති අපි පළාත් පාලන වලට එවනවා. නිලධාරින්ගේ වගකීම තමයි ඇස්තමේන්තු හදලා සුදානම් වෙලා තියන් ඉන්න එක. අනුමැතිය ආපු ගමන් වැඩ පටන් ගන්න පුළුවන්. නිලධාරින් හිතන් ඉන්නවා නම් ආණ්ඩුව වෙනස් වෙනවා කියලා; නෑ ආණ්ඩුව තියෙනවා. මේ අවුරුද්දේ තියන්නේ ජනාධිපතිවරණය විතරයි.සමහර නිලධාරින් හිතාමතාම ප්‍රමාද කරනවා. මම කියන්නේ බැරි අයව අයින් කරලා වැඩ කරන්න පුළුවන් පිරිසක් තියන්න කියලා. අපි ගමනක් යනකොට වැඩ කරන්න පුළුවන් පිරිසක් ඉන්න ඕනේ.ඇතැම් රාජ්‍ය ආයතනවල දේශපාලඥයාට ඇතුළු වෙන්න බෑ කියලා මතයක් තියෙනවා. එහෙම වෙන්න බෑ. මොකද දේශපාලඥයා කියන්නේ මේ රටේ පුරවැසියෙක්. අද පළාත් පාලන ආයතවල දේශපාලන අධිකාරිය නැති නිසා නිලධාරීවාදය වැඩ කරන්නේ නෑ. සල්ලි පස්සේ විතරයි දුවන්නේ. දේශපාලන අධිකාරිය මහජනතාව වෙනුවෙන් පෙනී සිටිලා කතා කරපු එක අද සිද්ධ වෙන්නේ නෑ”
