19 වැනි ආසියානු ක්‍රීඩා උලෙළ චීනයේ හැංජෝහිදී අද (23) ආරම්භ වෙනවා.
එහි සමාරම්භක උත්සවය අද හැංජෝ ඔලිම්පික් ක්‍රීඩාංගණයේදී පැවැත්වීමට නියමිතයි.
මෙවර ආසියානු ක්‍රීඩා උලෙළට රටවල් 45ක් නියෝජනය කරමින් ක්‍රීඩක ක්‍රීඩිකාවන් 12,500කට අධික සංඛ්‍යාවක් සහභාගි වීමට නියමිතව ඇති බව වාර්තා වෙනවා.
එහිදී ශ්‍රී ලංකාව නියෝජනය කරමින් ක්‍රීඩක ක්‍රීඩිකාවන් සියයකට ආසන්න සංඛ්‍යාවක් සහභාගි වීමට සැලසුම් කර ඇති අතර, ඔවුන් ක්‍රීඩා 21ක් වෙනුවෙන් තරඟ බිමට පිවිසීමට නියමිතයි.
මේ අතර, මෙවර ආසියානු ක්‍රීඩා උලෙළේ සමාරම්භක උත්සවයේ දී ජාතික ධජය රැගෙන යාමේ වගකීම මලල ක්‍රීඩිකා ගයන්තිකා අබේරත්නට හිමිව තිබෙනවා.
ඔලිම්පික් ක්‍රීඩා උලෙළට පසු පැවැත්වෙන දැවැන්තම ක්‍රීඩා උලෙළ වන ආසියානු ක්‍රීඩා උලෙළ අද සිට දින 16ක් පුරා පැවැත්වෙන අතර, එහි තරඟ ස්ථාන 54ක දී පැවැත්වීමට නියමිතයි.
මේ අතර, ආසියානු ක්‍රීඩා උළෙලේ කාන්තා ක්‍රිකට් තරඟාවලියේ අවසන් පුර්ව වටයේ තරඟ හෙට (24) ආරම්භ වෙනවා.
එහි පළමු තරඟය ඉන්දීය කාන්තා කණ්ඩායම සහ බංග්ලාදේශ කාන්තා කණ්ඩායම අතර පැවැත්වීමට නියමිතයි.
දෙවැනි තරඟය ශ්‍රී ලංකා කාන්තා කණ්ඩායම සහ පාකිස්තාන කාන්තා කණ්ඩායම අතර මෙරට වේලාවෙන් හෙට පෙරවරු 11.30ට ආරම්භ වීමට නියමිත බව සඳහන්.
මෙම තරඟ දෙකෙන් ජය ගන්නා කණ්ඩායම ලබන 25 වන දා පැවැත්වීමට නියමිත ආසියානු ක්‍රීඩා උලෙළේ කාන්තා ක්‍රිකට් තරගාවලියේ අවසන් මහා තරගයට සුදුසුකම් ලබා ගනු ඇති .
