අද (11) දින පෙරවරු 7 සිට දහවල් 12 දක්වා සියලු සෞඛ්‍ය සේවාවලින් ඉවත්වීමට සෞඛ්‍ය වෘත්තීය සමිති එකමුතුව තීරණය කර ඇත.
වෛද්‍ය රාසායනාගාර වෘත්තීයවේදීන්ගේ සංගමය,රජයේ හෙද නිලධාරීන්ගේ සංගමය,ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය,ශ්‍රී ලංකා පවුල් සෞඛ්‍ය සේවා නිලධාරීන්ගේ සංගමය ඇතුළු සෞඛ්‍ය වෘත්තීය සමිති 28ක් විසින් මෙම වෘත්තීය ක්‍රියාමාර්ගයට එළැඹ තිබේ.
කොරෝනා මර්දන වැඩපිළිවෙලේ සිටින සෞඛ්‍ය කාර්ය මණ්ඩල වලට අවශ්‍ය පහසුකම් ලබා නොදීමත් මේ සම්බන්ධව සෞඛ්‍ය අමාත්‍යවරිය සමඟ සාකච්ජා පැවැත්වුවද ේ සම්බන්ධයෙන් ධනාත්මක පිළිතුරක් ලබා දීමට කටයුතු කර නොමැති වීමත් පාදක කරගෙන මෙම වෘත්තීය සමිති ක්‍රියාමාර්ගයට එළැඹුණු බවයි මේ සම්බන්ධයෙන් අදහස් දක්වමින් රජයේ හෙද නිලධාරීන්ගේ සංගමයේ සභාපති සමන් රත්නප්‍රිය මහතා ප්‍රකාශ කර සිටියේ.
සංචරණ සීමා පනවා තිබෙන මොහොතක සෞඛ්‍ය සේවකයන්ට ප්‍රවාහන පහසුකම් හෝ නොමැති බවයි රත්නප්‍රිය මහතා පෙන්වා දෙන්නේ.
පවතින තත්ත්වය හමුවේ වෛද්‍ය සේවාවේ පමණක් අතිකාල දීමනා වැඩිකර තිබෙන නමුත් සෙසු සෞඛ්‍ය සේවකයින්ට අවශ්‍ය පහසුකම් ලබා දී නැති බවත් කොරෝනා රෝගීන් සිටින රෝහල්, වාට්ටු තුළ මෙම වැඩ වර්ජනය නොමැති අතර මෙම වර්ජනය හේතුවෙන් කොවිඩ් එන්නත්කරණ වැඩසටහන අද දින ක්‍රියාත්මක නොවන බවත් ඔහු පවසනවා.
