බලධාරීන්ගේ නොසැලකිල්ල හේතුවෙන් බස්නාහිර පළාතේ රෝහල්වල විශේෂඥ සහ වැඩබලන විශේෂඥ වෛද්‍යවරුන් ලෙස සේවය කරන වෛද්‍යවරුන් 29 දෙනෙකුට පසුගිය මාස 6 ක කාලයක පටන් සිය වැටුප් ලැබී නොමැති බවට News 19 වෙත තොරතුරු වාර්තා වනවා.
වැටුප් නොලැබීමෙන් පීඩාවට පත්වූ මේ පිළිබදව තොරතුරු අනාවරණය කළ විශේෂඥ වෛද්‍යවරයෙකු සදහන් කළේ තමන්ගේ වැටුප පළාත් සභාවෙන් ගෙවිය යුතු බවට මධ්‍යම රජයත්, එය මධ්‍යම රජයෙන් ගෙවිය යුතු බවට පළාත් සභාවත් කඹ ඇඳීමක නිරතව සිටින බවයි.
බලධාරීන්ගේ මෙම හැසිරීම හේතුවෙන් කොරෝනා වසංගත මැද දැඩි අසීරුතාවයකින් රාජකාරියේ නිරතව සිටින තමන්ට ආර්ථික වශයෙන්ද පීඩාවට පත්වීමට සිදුව ඇතැයි එම වෛද්‍යවරු සදහන් කරනවා.
මේ පිළිබදව අදාල විශේෂඥ වෛද්‍යවරු පිරිස හා රජයේ වෛද්‍ය නිලධාරීන්ගේ සංගමයද සෞඛ්‍ය අමාත්‍යාංශය මෙන්ම බස්නාහිර පළාත් සෞඛ්‍ය බලධාරීන්ද අවස්ථා ගණනාවකදී දැනුවත් කර ඇතත් මේ වන තෙක් නිසි විසඳුමක් ලැබී නොමැතිවිම විශේෂත්වයක්.
