පවතින අධික වර්ෂාව හේතුවෙන් ශ්‍රී ලංකා ඛණිජ තෙල් නීතිගත සංස්ථාවට අයත් සපුගස්කන්ද තෙල් පිරිපහදුවේ ඉවත් වන ඉන්ධන වැසි ජලයත් සමඟ ප්‍රදේශය පුරා කාන්දුවී තිබුණා.
මෙම තත්ත්වය හේතුවෙන් ප්‍රදේශය පුරා දැඩි දුර්ගන්ධයක් පවතින බවත් භූගත ජලය බීමට ගත නොහැකි තත්ත්වයට පත්ව ඇති බවත්, නල ජලයද භාවිතා කිරීමේ අවධානමක් පවතින බවත් ප්‍රදේශවාසීන් චෝදනා කරනවා.
එම ඉන්ධන පැතිරයාම වැළැක්වීම සහ ඉවත් කිරීම සඳහා නාවික හමුදාව හා වෙරළාරක්ෂක දෙපාර්තමේන්තුව විශේෂ මෙහෙයුමක් ආරම්භ කළ අතර පැවති අධික වර්ෂාවත් සමග සපුගස්කන්ද හෙයියන්තුඩුව ප්‍රදේශයේ ගං වතුර තත්ත්වයක් හට ගැණුනා.
වැසි ජලය සමග මිශ්‍ර වී ඇති මෙම දැවි තෙල් මිශ්‍රිත ජලය පවතින වර්ෂාපතනය අඩු වි කැළණි ගඟේ ජල මට්ටම අඩු වීමත් සමග පට්ටිවෙල ඇල හරහා කැළණි ගඟට එක් වීමේ අවධානමක් ද තිබෙනවා.
මෙම තත්ත්වය නිරික්ෂණය කිරීමට එම ස්ථානයට ගිය බලශක්ති අමාත්‍ය උදය ගම්මන්පිල මහතාට ප්‍රදේශවාසීන්ගෙන් දැඩි විරෝධයක් එල්ල වුණා.
ඔවුන් පැවසුවේ පවත්නා තත්ත්වය නිරීක්ෂණය කිරීමටත් පෙර අමාත්‍යවරයා මාධ්‍ය වටකරගනිමින් ඔවුන්ට අදහස් දැක්වීමට කටයුතු කළ බවයි.
මේ අතර දැවි තෙල් මිශ්‍රණ අඩංගු ඉන්ධන වැසි ජලය හරහා කැළණි ගඟට මුසු වීමේ අවධානම බෙදා හරින පානීය ජලයේ ගුණාත්මකභාවයට හානි සිදුව ඇතැයි මෙතෙක් අනාවරණය නොමැති බවද ජාතික ජල සම්පාදන හා ජලාපවහන මණ්ඩලය පවසනවා.
