සියළු දේශපාලන පක්ෂ ජාතික ලැයිස්තුවෙන් සියයට 50ක් කාන්තාවන් සඳහා වෙන් කළ යුතු බවට පාර්ලිමේන්තු කාන්තා මන්ත්‍රීවරියන්ගේ සංසදය විසින් යෝජනාවක් ඉදිරිපත් කර තිබෙනවා.
‘මාර්තු 12 ව්‍යාපාරය’ විසින් ඊයේ (25) ඒ සූම් තාක්ෂණය ඔස්සේ සංවිධාන කර තිබූ සාකච්ඡාවකට එක්වෙමින්.
මේ අතර, මෙරට පවතින මැතිවරණ ව්‍යුහයේ කාන්තා නියෝජනය ඉහළ නැංවීම සඳහා පාර්ලිමේන්තු හා පළාත් මට්ටමින් කාන්තාවන් සඳහා සියයට 30ත්, 70ත් අතර නියෝජනයක් සහතික කිරීමේ යෝජනාවක් මැතිවරණ හා ඡන්ද විමසීම් නීති රීති ප්‍රතිසංස්කරණය සඳහා වන පාර්ලිමේන්තු විශේෂ කාරක සභාවට ලිඛිතව දැනුම්දීමට තීරණය කර තිබෙනවා.
පසුගියදා එම සංසදය පාර්ලිමේන්තුවේදී රැස්වී ඇති අතර පළාත් පාලන මට්ටමේ ඡන්ද සියයට විසිපහේ කෝටාව නොවෙනස්ව පවත්වා ගැනීම තහවුරු කර ගැනීම සඳහා වන යෝජනාවක් ද ඉදිරිපත් වුණා.
එමෙන්ම, පවතින ඡන්ද ක්‍රමය වෙනස් කිරීම සඳහා පත් කර ඇති පාර්ලිමේන්තු තේරීම් කාරක සභාව ලබන මාසයේ සිට මහජන සාක්ෂි විමසීමට අපේක්ෂා කරන බව එහි සභාපති අමාත්‍ය දිනේෂ් ගුණවර්ධන පවසනවා.
මැතිවරණ ක්‍රමය සංශෝධනය සඳහා නිර්දේශ ඉදිරිපත් කිරීමට පත් කර ඇති පාර්ලිමේන්තු තේරීම් කාරක සභාව ඉදිරි මාස 06 ඇතුළත සමාජයේ සියළු පාර්ශව නියෝජනය වන අයුරින් අදහස් හා යෝජනා ලබා ගන්නා බවයි එහිදී අමාත්‍ය දිනේෂ් ගුණවර්ධන සඳහන් කළේ.
