බ්‍රිතාන්‍ය රජයේ සෞඛ්‍ය ලේකම් මැට් හැන්කොක්, කොවිඩ්-19 නීති උල්ලංඝනය කිරීම පිළිබඳ ඔහුට එරෙහිව එරට වැසියන්ගෙන් එල්ල වුණු දරුණු විරෝධය හමුවේ ඉල්ලා අස්වී තිබේ.
සෞඛ්‍ය ලේකම්වරයාට ඉල්ලා අස්වීම සඳහා බලකිරීමට හේතුව ලෙස සැලකෙන්නේ සෞඛ්‍ය දෙපාර්තමේන්තුවේ ලන්ඩන් මූලස්ථානයේදී ඔහුගේ ඉහළම සහායිකාව ලෙස සැලකෙන ජිනා කොලඩන්ජෙලෝ සමඟ සිප ගන්නා වීඩියෝවක් නිකුත් වී තිබීමයි.
නීති කඩකළ බව පිළිගත්තද ඔහු මුලින් ඉල්ලා අස්වීම ප්‍රතික්ෂේප කරනු ලැබුවේය.
හැන්කොක්ට එරෙහිව ක්‍රියාමාර්ගයක් නොගැනීම පිළිබඳ අගමැති බොරිස් ජොන්සන් ද විවේචනයට ලක් විය.
මෙම වීඩියෝ පටය මැයි හය වෙනි දා ලබා ගත්තක් බව සැලකේ.
ඒ වන විට බ්‍රිතාන්‍යයේ කොවිඩ්-19 නීති දැඩි ලෙස ක්‍රියාත්මක වුණු අතර සමාජ රැස්වීම් තහනම් විය.
මීටර් දෙකක අවම දුරස්ථභාවය පවත්වා ගන්නා ලෙසත් මුහුණට මුහුණ සම්බන්ධතා වළක්වා ගන්නා ලෙසත් රජය ජනතාවගෙන් ඉල්ලීම් කර තිබිණි.
හැන්කොක් විසින් අගමැතිවරයා වෙත යොමු කරන ලද ලිපියේ “මෙම වසංගතයේදී මෙතරම් කැපකිරීම් කළ පුද්ගලයින්ට මම ණයගැතියි” යනුවෙන් සඳහන් කර තිබේ.
පසුගිය වසරේ නොවැම්බරයේදී සෞඛ්‍ය සහ සමාජ සත්කාර දෙපාර්තමේන්තුවේ නොගෙවූ උපදේශකයකු ලෙස පත් කර ඇති ජිනා ඔහුගේ විශ්වවිද්‍යාල සගයෙකි.
පසුව ඇය සෞඛ්‍ය දෙපාර්තමේන්තුවේ විධායක නොවන අධ්‍යක්ෂවරයකු ලෙස පත් කිරීමට කටයුතු කර ඇති බව සඳහන් වේ.
“සෞඛ්‍ය මග පෙන්වීම් කඩ කිරීම ගැන මගේ සමාව නැවත අවධාරණය කිරීමටත්, මගේ පවුලේ අයගෙන් සහ ආදරණීයයන්ගෙන් සමාව අයැදීමටත් මට අවශ්‍යය. මේ අවස්ථාවේ මගේ දරුවන් සමඟ සිටීමට ද මට අවශ්‍ය වී තිබේ.”යයි ඔහු අගමැතිවරයාට යොමු කළ ලිපියේ සඳහන් වේ.ඉල්ලා අස්වීම පිළිබඳ ප්‍රකාශයක් නිකුත් කරමින් ට්විටර් වීඩියෝවක් නිකුත් කිරීමට ද සෞඛ්‍ය ලේකම්වරයා කටයුතු කර ඇත.
කෙසේවෙතත් ඔහුගේ ලිපිය හෝ ප්‍රකාශයේ ඔහුගේ බිරිඳ මාර්තා ගැන සඳහනක් කර නැත.
