ඇමරිකානු ඩොලර් බිලියනයක ඉලක්කයක් සපුරාගැනීම සදහා ක්‍රියාත්මක “රුසියානු සංචාරක බුබුළ” සංකල්පයට අනුව අද (09) රුසියානු සංචාරකයින් 44 දෙනෙක් දිවයිනට පැමිණ තිබෙනවා.
රුසියාවේ මොස්කව් නගරයේ සිට පැමිණි ගුවන්යානයකින් දිවයිනට පැමිණි මෙම සංචාරකයින් සංචාරක බුබුලක් ඔස්සේ දිවයිනේ ස්ථාන රැසක සංචාරය කිරීමට නියමිතයි.
මෙම වැඩසටහන යටතේ මීට පෙර අගෝස්තු පළමුවැනිදා රුසියානු ජාතිකයින් 30 ක් රැගත් ගුවන් යානයක් දිවයිනට පැමිණියා.
මෙය සංවිධානය කරන රුසියාවේ හිටපු තානාපති උදයංග වීරතුංග මහතා පවසන්නේ මෙම වැඩසටහන යටතේ රුසියානු සංචාරකයන් 6144 දෙනෙක් දිවයිනට පැමිණීමට නියමිත බවයි.
ලෝක වසංගත තත්ත්වය හමුවේ මෙරට සංචාරක කර්මාන්තය යළි සක්‍රීය තත්ත්වයට පත් කිරීම සඳහා මෙම ව්‍යාපෘතිය ක්‍රියාත්මක කෙරෙන බව ඔහු වැඩිදුරටත් සදහන් කරනවා.
සංචාරකයන්ට ශ්‍රීලංකාවට පැමිණීම පීඩාකාරී නොවන ආකාරයට සෞඛ්‍ය නිර්දේශ ක්‍රියාත්මක වියයුතු බව මුදල් අමාත්‍ය බැසිල් රාජපක්ෂ මහතා පසුගිය සතියේ සංචාරක ක්ෂේත්‍රයට සම්බන්ධ අංශ සමග පැවැති සාකච්ඡාවක දී අවධාරණය කළා.
කෙසේ වෙතත් උදයංග වීරතුංග මහතා මීට පෙර අවස්ථාවක සඳහන් කළේ රුසියානු ජාතිකයන්ගෙන් 20% පිරිසක් පමණක් කොවිඩ් වැක්සීනය භාවිතා කර ඇති බවත් බහුතර රුසියානුවන් මෙම වැක්සීනය භාවිතා කිරීම ප්‍රතික්ෂේප කරන බවත්ය.
