මේ වනවිට ඇෆ්ගනිස්තානයේ ප්‍රදේශ ගණනාවක බලය තහවුරු කරගෙන සිටින තලේබාන් සංවිධානය අලුතින් අල්ලාගත් ප්‍රදේශවල දේපල කොල්ලකෑමේ යෙදෙන බවට චෝදනා එල්ල වී තිබේ.
විදෙස් මාධ්‍ය වාර්තා කරන්නේ ඔවුන් රාජ්‍ය ආයතනවල දේපල මෙන්ම පෞද්ගලික දේපලද කොල්ලකෑමේ නිරතවන බවයි.
නිම්රෑස් පළාතේ සරාන්ජ් අගනුවර අල්ලාගත් තලේබාන් සාමාජිකයන් එහි රාජ්‍ය ආයතනවලට ඇතුලු වී සියලු වටිනා දේපළ පැහැරගෙන ගොස් ඇති බව ප්‍රාදේශීය බලධාරීන් වීඩියෝ සාක්කි සහිතව කරුණු දක්වා තිබේ.
තලේබාන් සංවිධානය සාමයට කැමති බවටත් රට දියුණු කරන්නට අවශ්‍ය බවටත් ප්‍රකාශ කළ ද ඔවුන්ට එවැනි උවමනාවක් නොමැති බවට ඇතැම් ඇෆ්ගනිස්තාන වැසියෝ චෝදනා කරති.
ඔවුන් සදහන් කරන්නේ බන්ධනාගාරවල සිරකරුවන් මුදාහරිමින් දේපළ පැහැරගෙන යමින් තලේබාන්වරුන් ඇෆ්ගනිස්තානය ආගාධයට ඇද දමන බවයි.
