ඉන්දියාවෙි 75 වන නිදහස් දිනය යෙදුණු අද (15) ,ජම්මු සහ කාශ්මීරයේ දී අන්කවරදාකයත් නොවුණු ලෙස සැමරුම් උත්සව පැවැත්වූ බව වාර්තා වේ.
ඩෙකෑන් හෙරල්ඩ් පුවත්පත වාර්තා කරන්නේ මෙවර ඉන්දීය නිදහස් දින සැමරුම ඉහළින් සමරන ලෙස ප්‍රාන්ත ආණ්ඩුකාරවරයා ද නියෝග කර තිබූ බවයි.
මේ අනුව ජම්මු සහ කාශ්මීරයේ පිහිටි සියලුම පාසල් ඇතුළු අධ්‍යාපන ආයතන, රජයේ ආයතන මෙන්ම ඇතැම් පෞද්ගලික ආයතනවලද ඉන්දීය ජාතික ධජ ඔසවා තිබූ බව සදහන් වේ.
මේ හේතුවෙන් ජම්මු සහ කාශ්මීරයේ ජාතික ධජ හිගයක් පැවති බවත්, වෙනදාට ඉන්දීය රුපියල් සියයකට මිලදී ගත හැකි ජාතික ධජයක් මෙවර ඉන්දීය රුපියල් 500 ක් පමණ වූ බවත් ඩෙකෑන් හෙරල්ඩ් පුවත්පත වැඩිදුරටත් වාර්තා කරයි.
කාශ්මීර සටන්කාමීන් විසින් දියත් කරන විරෝධතා සහ අනතුරු ඇඟවීම් හේතුවෙන් පෙර වසරවල ජම්මු සහ කාශ්මීරයේ, ඉන්දීය නිදහස් දින සැමරුම පැවැත්වූයේ සීමාසහිත ලෙසය.
මෙම වසරේදී එම තත්වය වෙනස් වී ඇති බවත් ඉන්දීය නිදහස් දිනය සැමරීම සදහා ජම්මු සහ කාශ්මීරයේ ඉහළ ජනතා සහභාගිත්වයක් පැවති බවත් සදහන් වේ.
