ඖෂධ නිෂ්පාදනය, සැපයීම හා නියාමන රාජ්‍ය අමාත්‍ය චන්න ජයසුමන මහතා විසින් ඊයේ (21) දින පාර්ලිමේන්තුවට ඉදිරිපත් කළ ඖෂධ ලැයිස්තුව අසත්‍ය ලැයිස්තුවක් බව හිටපු සෞඛ්‍ය අමාත්‍ය රාජිත සේනාරත්න මහතා අද දින පාර්ලිමේන්තුව අමතමින් පෙන්වා දුන්නා.
චන්න ජයසුමන මහතාගේ ලැයිස්තුවේ සඳහන් වූ ඖෂධ වල මිල ගණන් එකින් එක පෙන්වා දෙමින් ඔහු පවසා සිටියේ රාජ්‍ය අමාත්‍යවරයා විසින් ජනතාව නොමග යවා ඇති බවත් ඇතැම් මාධ්‍ය විසින් මේ සම්බන්ධව කරුණු විමසීමකින් තොරවම පළ කර ඇති බවත් ය.
යහපාලන රජය සමයේදී ඖෂධ වර්ග 48 ක මිල පාලන මිල ගණන් යටතේ ඉතා විශාල ලෙස අඩු කිරීමට කටයුතු කළ බවත් ඒ හරහා වසරකට බිලියන 4.4 ක් හෙවත් කෝටි 440 ක ලාභයක් ජනතාවට ලැබුණු බවත් එනම් බිලියන 4.4ක් සමාගම් පාඩු ලැබූ බවත් සෞඛ්‍ය විගණනයේදී හෙළිවූ බවයි රාජිත සේනාරත්න මහතා පවසන්නේ.
එක් රෝගියෙකු වෙනුවෙන් පැවති ලක්ෂ 15ක සීමාව ඉවත් කරමින් ලෙඩෙකු මියයන තෙක් ප්‍රතිකාර කිරීම හරහා එක් රෝගියෙකුට ඇතැම් විට ලක්ෂ 400-500 පවා වියදම් කරමින් සැබෑ ලෙසම සේනක බිබිලේ ප්‍රතිපත්තිය ක්‍රියාත්මක කළේ සිය අමාත්‍යධූරය යටතේ බවත් චන්න ජයසුමන මහතාගේ ලැයිස්තුවේ සඳහන් මිල ගණන් කිසිවක් යහපාලන රජය සමයේදී මිලදී ගත් සැබෑ මිල ගණන් නොවන බවත් ඔහු අවධාරණය කර සිටියා.
