ශ්‍රී ලංකා රදගුරු සම්මේලනය සහ පාර්ලිමේන්තුව නියෝජනය කරන කතෝලික මන්ත්‍රීවරුන් අතර විශේෂ රැස්වීමක් කොළඹ 08 බැල්කොම් පෙදෙසේ පිහිටි එම සම්මේලන කාර්‍යාලයේදී අද (29) පෙරවරුවේ පැවැත්වුණා.
බදුල්ල රදගුරු අති උතුම් වින්ස්ටන් ප්‍රනාන්දු හිමිපාණන් ප්‍රධානව අගරදගුරු අති උතුම් මැල්කම් කාදිනල් රංජිත් හිමිපාණන් සහ කතෝලික රදගුරුතුමන්ලා සහ සහායක රදගුරුතුමන්ලා පළමුව රැස්වී සාකච්ඡා කර අනතුරුව පක්ෂ විපක්ෂ කිතුනු පාර්ලිමේන්තු මන්ත්‍රීවරුන් හමුවුණා.
එහිදී පාස්කු දින ප්‍රහාරයේ පරීක්ෂණ කටයුතු මෙන්ම රටේ වත්මන් තත්වය පිළිබඳවද සාකච්ඡා කර තිබෙනවා.
නමුත් මෙම විශේෂ රැස්වීම සඳහා පාර්ලිමේන්තු මන්ත්‍රීවරුන් 5 දෙනෙක් පමණක් සහභාගී වීම බොහෝ දෙනාගේ කතාබහට ලක්වුණා.
විපක්ෂය නියෝජය කරමින් හෙක්ටර් අප්පුහාමි, කාවින්ද ජයවර්ධන, චාල්ස් නිර්මලනාදන්, සෙල්වම් අඩික්කලනාදන් යන පාර්ලිමේන්තු මන්ත්‍රීවරුන් පැමිණ ඇති අතර ආණ්ඩු පක්ෂය නියෝජනය කරමින් පැමිණ ඇත්තේ රාජ්‍ය අමාත්‍ය නිමල් ලන්සා පමණක් වීම විශේෂත්වයක්.
පාස්කු ප්‍රහාරය පිළිබඳ සෙවීමේ ජනාධිපති කොමිෂන් සභාවේ නිර්දේශ ක්‍රියාත්මක නොවීම ගැන රදගුරු සම්මේලනය කලකිරීමට පත්ව සිටින බවත් ඉදිරියේදී මේ සම්බන්ධව ඒකාබද්ධ නිවේදනයක් නිකුත් කරන බවත් රදගුරුතුමන්ලා මෙහිදී මන්ත්‍රීවරුන්ට දැනුම්දී තිබෙනවා.
