චීනයේ ෂින්ජියැන්ග් කලාපයේ දැඩි මානව හිමිකම් උල්ලංඝනය කිරීම් අඛණ්ඩව සිදුකරන බව එක්සත් ජනපද රාජ්‍ය ලේකම් ඇන්තනි බ්ලින්කන් වාර්ෂික මානව හිමිකම් වාර්තාව නිකුත් කරමින් පැවති දේශනයක දී පවසා තිබේ.
වාර්තාවේ චීනය පිළිබඳ පරිච්ඡේදය ගැන සඳහන් කරමින් “චීනය, ෂින්ජියැන්ග් හි මනුෂ්‍යත්වයට එරෙහි අපරාධ දිගටම කරගෙන යන බව බ්ලින්කන් පැවසීය.
එක්සත් ජනපදය මෙම වාර්තාවෙන් චීනය අත්තනෝමතික රාජ්‍යයක් බව පෙන්නුම් කරන බව ද සදහන් කරයි.
එම වාර්තාවට අනුව, වසර තුළ දී ප්‍රධාන වශයෙන් ජන සංහාරය සහ මනුෂ්‍යත්වයට එරෙහි අපරාධ සිදුව ඇත්තේ මුස්ලිම් උයිගුර්වරුන් ඇතුළු ෂින්ජියැන්ග්හි අනෙකුත් වාර්ගික සහ ආගමික සුළුතර කණ්ඩායම්වල සාමාජිකයින්ට එරෙහිවයි.
චීන රජයේ නිලධාරීන් සහ ආරක්ෂක අංශ බොහෝ විට මානව හිමිකම් උල්ලංඝනය කිරීම් සිදු කළේ දඬුවම් විරහිතව බව ද වාර්තාව වැඩිදුරටත් පවසයි.
පොලිසිය විසින් වාර්තා කරන ලද ඝාතන සිද්ධීන්වලින් පසුව බලධාරීන් බොහෝ විට විමර්ශන ප්‍රකාශයට පත් කළ නමුත් පොලිස් විෂමාචාර හෝ විනය ක්‍රියාමාර්ගවල ප්‍රතිඵල හෝ සොයාගැනීම් ප්‍රකාශයට පත් කර නැති බව ද එහි දැක්වේ.
