වීරකැටිය කාල්ටන් නිවසට පිරිසක් පහරදුන් අවස්ථාවේදී එම නිවසේ සිටි බලු පැටවුන් තිදෙනාගෙන් එක් බලු පැටවෙකු සොයාගැනීමට ශ්‍රී ලංකා පොලිස් දෙපාර්තමේන්තුවට හැකිවී තිබෙනවා.
ඒ අනුව නැතිවූ බලු පැටවා හිටපු එක්සත් ජාතික පක්ෂ මන්ත්‍රීවරයෙකුගේ නිවසේ සිටියදී වීරකැටිය පොලීසිය සොයාගෙන ඇති බවයි වාර්තා වන්නේ.
වීරකැටිය – තංගල්ල මාර්ගයේ පිහිටි මහින්ද රාජපක්ෂට අයත් කාල්ටන් වත්තෙහි සිටි මෙම බලු පැටවුන් තිදෙනා පසුගිය 09 වනදා සිට අතුරුදහන්ව තිබෙනවා.
ඒ කිසියම් පිරිසක් රාජපක්ෂවරුන්ගේ මෙම ඉඩමට ඇතුළුවී එහි දේපලවලට අලාභහානි කර ගිනි තැබීමෙන් අනතුරුවයි.
පොලීසිය පවසන්නේ මෙම බලු පැටවුන් ලැබ්‍රඩෝර් වර්ගයට අයත් සුරතල් බලු පැටවුන් බවයි.
බලු සොරකම සම්බන්ධයෙන් හිටපු මන්ත්‍රීවරයාගේ 21 හැවිරිදි දියණියක් සැකපිට අත්අඩංගුවට ගැනීමට පොලීසිය සමත්වුණා.
වීරකැටිය පොලිස් ස්ථානාධිපති පොලිස් පරීක්ෂක කැළුම් සංගීත් මහතා ඇතුළු අනෙකුත් වීරෝධාර නිලධාරීන් මේ වන විට නැතිවී සිටින අනෙකුත් බලු පැටවුන් දෙදෙනා සොයා පුළුල් මෙහෙයුමක් ක්‍රියාත්මක කර තිබෙනවා.
