දකුණු චීන මුහුදේදී පිලිපීනය වෙත ප්රහාරයක් එල්ල වුවහොත් ඔවුන්ගේ ආරක්ෂාව වෙනුවෙන් පෙනී සිටින බව අමරිකාව පවසයි.
දෙරට අතර පවතින ආරක්ෂක ගිවිසුම පුළුල් කිරීම සඳහා සිය දායකත්වය දැක්වීමක් වශයෙන් අමෙරිකාව මේ බව සඳහන් කර ඇතැයි විදෙස් වාර්තා පෙන්වා දී තිබේ.
කෙසේවෙතත් මේ සම්බන්ධයෙන් වැඩි අවදානයක් යොමු වුණේ පිලිපීනයේ නව ජනාධිපති ජූනියර් ෆර්ඩිනැන්ඩ් මාකෝස් හමුවීම සඳහා අමෙරිකානු රාජ්ය ලේකම් ඇන්ටනී බ්ලින්කන් පිලිපීනයේ මැනිලා අගනුවරට පැමිණ සිටින පසුබිමක් තුළයි.
අමෙරිකානු රාජ්ය ලේකම්වරයා මෙලෙස චීනය ආසන්න ආසියානු රටකට පැමිණ සිටින්නේ අමෙරිකානු කථානායක නැන්සි පෙලෝසිගේ තායිවාන සංචාරයෙන් කෝපයට පත්ව සිටින චීනය මතභේදකාරී යුද අභ්යාසයක නිරත වී සිටින පසුබිමක් තුළ වීම විශේෂත්වයක්.
කෙසේවෙතත් අමෙරිකාව පිලිපීනයට පවසා ඇත්තේ දෙරට අතර පවතින වසර 70 ක් පැරණි ආරක්ෂක ගිවිසුම යකඩ ආවරණයක් බවයි.
එමෙන්ම පිලිපීනය යනු අමෙරිකාවේ ප්රතිස්ථාපනය කළ නොහැකි මිතුරෙකු හා සමීප හවුල්කරුවෙකු බව ද රාජ්ය ලේකම්වරයා පවසා තිබේ.