ජෝෂප් පරරාජසිංහම් ඝාතනය සම්බන්ධ නඩුවෙන් පිල්ලෙයාන් ඇතුළු චුදිතයන් නිදොස් කොට නිදහස් කිරීම මගින් මූර්තිමත් කරන්නේ යුද සමයේ අපරාධ සම්බන්ධයෙන් යුක්තිය ඉටුකිරීමට ශ්‍රී ලංකා බලධාරීන් අපොහොසත්වීම යැයි විනිසුරුවන් සහ නීතිවේදීන්ගෙන් සමන්විත නීති විශාරදයන්ගේ ජාත්‍යන්තර කොමිසම (අයි.සී.ජේ) නිවේදනයක් නිකුත් කරමින් පවසයි.
චුදිතයන්ට එරෙහි චෝදනා ඉල්ලා අස්කරගත් නමුත් නීතිපතිවරයා ඊට හේතු හෙළි කර නොමැති යැයි ද වසර පහකට පසුව එසේ චෝදනා ඉල්ලා අස්කර ගැනීම ප්‍රහාරයේ වින්දිතයන්ට එල්ලකරන ලද බරපතල පහරක් යැයි ද අයි.සී.ජේ සංවිධානය චෝදනා කරයි.
පිල්ලෙයාන් නිදොස්කොට නිදහස්කරන ලද්දේ හිටපු පාර්ලිමේන්තු මන්ත්‍රී නඩරාජා රවිරාජ් ඝාතනය පිළිබඳ චෝදනා ලබා සිටි නාවික හමුදා චූදිතයන් සිංහල පමණක් කතාකරන ජූරි සභාවක් විසින් අයුරින්ම නිදහස් කරනු ලැබීමෙන් වසර කිහිපයකට පසුව යැයි නීති විශාරදයන්ගේ ජාත්‍යන්තර කොමිසම සිය නිවේදනයෙන් අවධාරණය කර ඇත.
දෙමළ ජාතික සන්ධානයේ හිටපු පාර්ලිමේන්තු මන්ත්‍රීවරයෙකු වූ ජෝෂප් පරරාජසිංහම් වෙඩි තබා ඝාතනය කෙරුණේ 2005 නත්තල් දින දේව මෙහෙයකට සහභාගි වෙමින් සිටියදීය.
ඝාතනය සිදුවන අවධිය වන විට ටී.එම්.වී.පී හෙවත් කරුණා පාර්ශ්වය රජයේ අනුග්‍රහය ලැබූ පැරාමිලිටරි සංවිධානයක් හැටියට කටයුතු කළේය.
