ඉන්දියාවේ පට්නා දුම්රිය ස්ථානය තුළ ජනාකීරණ අවස්ථාවක අංක 10 දුම්රිය වේදිකාවේ ඇති රූපවාහිනී තිරය මත අසභ්‍ය චිත්‍රපටයක් පෙන්වීම හේතුවෙන් ඒ මොහොතේ එම ස්ථානයේ සිටි දුම්රිය මගීන් දැඩි ලෙස අහපසුතාවයට පත්ව ඇතැයි ඉන්දීය මාධ්‍ය වාර්තා කරනවා.
මෙම දුම්රිය ස්ථානයේ වෙළෙඳ දැන්වීම් ඇතුළු විවිධ දැන්වීම් පලකිරීම සඳහා මෙම රූපවාහිනී තිරය යොදාගෙන තිබෙනවා.
එහි එක්වරම අසභ්‍ය වීඩියෝ පටයක් ප්‍රදර්ශනය වි එය විනාඩි තුනක කාලයක් විකාශය කර ඇති බවයි ඉන්දීය මාධ්‍ය වාර්තා කරන්නේ.
මෙම රූපවාහිනි තිර සම්බන්ධයෙන් කටයුතු කරන Messrs M Dutta Studio Company Pvt Limited සමාගමට එරෙහිව මේ වන විට වෙන වෙනම පැමිණිලි දෙකක් ගොනු කර ඇති අතර සමාගම අසාදු ලේඛනගත කිරීමේ ක්‍රියාවලිය මේ වන විට ආරම්භ කර ඇතැයි ඉන්දීය දුම්රිය බලධාරීන් පවසනවා.
අදාළ සිදුවීමෙන් අනතුරුව මෙම රූපවාහිනී තිරවල දැන්වීම් විකාශනය කිරීමට එම ආයතනයෙන් යොදවා සිටි පුද්ගලයා පලාගොස් තිබෙනවා.
දුම්රිය ආරක්ෂක අංශ පවසන්නේ මේ වන විට ක්‍රියාත්මක පරීක්ෂණ සඳහා එම පුද්ගලයා ඉදිරිපත් නොවුනහොත් අදාළ සමාගමේ අනෙකුත් පුද්ගලයන් අත්අඩංගුවට ගැනීමටද වරෙන්තුවක් ඉල්ලා සිටින බවයි.
