මහ කන්නයේ වී මිල දී ගැනීමේ වැඩපිළිවෙළ සඳහා රජය රුපියල් බිලියන 20ක් දක්වා මුදල් වැය කිරීමට සූදානම් යැයි කෘෂිකර්ම අමාත්‍ය මහින්ද අමරවීර මහතා පවසනවා.
අද (27) පෙරවරුවේ වීරකැටිය හා අගුනකොළැපැලැස්සේ දී අඩු ආදායම්ලාභී පවුල් සඳහා රජය මගින් මාසයකට සහල් කිලෝ 10ක් බැගින් නොමිලේ ලබා දීමේ වැඩසටහනට සහභාගි වෙමින් අමාත්‍යවරයා මෙම අදහස් පළ කළා.
මෙවර මහ කන්නයේ වී මිල දී ගැනීමේ වැඩපිළිවෙළ රජය දිස්ත්‍රික් ලේකම්වරුන් හා ප්‍රාදේශීය ලේකම්වරුන් විසින් සිදු කරනු ලැබූ අතර කුඩා වී මෝල් අයිතිකරුවන්ගේ ආර්ථික තත්ත්වය නගා සිටු වීම සඳහා එම වී සහල් බවට පත් කර අඩු ආදායම්ලාභී පවුල් සඳහා නොමිලේ ලබා දීමට තීරණය කර තිබුණා.
මෙම සහල් බෙදා දීමේ වැඩසටහන එක් එක් දිස්ත්‍රික්කවලදී ඊයේ (26) සිට ආරම්භ වූ අතර මාස දෙකක් යන තෙක් සහල් කිලෝ 10ක් බැගින් එක් පවුලකට ලබා දීමට තීරණය කළ ද අවශ්‍ය වුවහොත් ඉදිරි මාස කිහිපයක් එක දිගට ම සෑම පවුලකට ම සහල් ලබා දීමේ වැඩපිළිවෙළ ක්‍රියාත්මක කිරීමට ජනාධිපතිවරයාගේ අවධානය යොමු කර ඇති බව අමාත්‍ය මහින්ද අමරවීර මහතා සඳහන් කළා.
කෘෂිකර්ම අමාත්‍යවරයා පවසන්නේ සහල් ලබා දීමේ වැඩසටහන දිගට ම ක්‍රියාත්මක කිරීමට නොහැකි වුවහොත් සියලු අඩු ආදායම්ලාභි පවුල් සඳහා යම් සහනාධාර මුදලක් වුවත් ලබා දීමට රජය සූදානම් බවයි.
