මෙරට ප්‍රථම කාන්තා නියෝජ්‍ය පොලිස්පතිනියක ලෙස පත් වූ බිම්ෂානි ජාසිංහආරච්චි මහත්මියගේ උසස් වීම අභියෝගයට ලක් කිරීම හෙළා දකින බවත් ඇයගේ වෘත්තීය අයිතිවාසිකම් සහ රැකියාවේ සුරක්ෂිතභාවය වෙනුවෙන් පක්ෂ භේදයකින් තොරව තම සංසදය පෙනී සිටින බව පාර්ලිමේන්තු මන්ත්‍රීවරියන්ගේ සංසදය අද (18) පාර්ලිමේන්තුවේදී මාධ්‍ය හමුවක් පවත්වමින් පවසයි.
එම සංසදයේ සභාපතිනි රජය අමාත්‍ය සුදර්ශනී ප්‍රනාන්දුපුල්ලේ මහත්මිය සඳහන් කරන්නේ බහුතරයක් පිරිමි නියෝජනය කරන ශ්‍රී ලංකා පොලීසිය වැනි ආයතනයක කාන්තාවක් එහි උසස්ම තනතුරකට පත්වීම පුරුෂ සමනාත්මතාවයට හවුල් වීමක් ලෙස සලකන බවයි.
නමුත් ඇයට එරෙහිව පවතින තත්ත්වය සම්බන්ධයෙන් අප්‍රසාදය පළකරන බවත් කාන්තාවන් පොලිස් සේවයට බඳවා ගන්නේ නම් නිසි ලෙස ඔවුන්ට උසස්වීම් පටිපාටිය සඳහා හිමිකම් තිබිය යුතු බව රාජ්‍ය අමාත්‍යවරිය කියා සිටියි.
මෙහිදී අදහස් දක්වන එම සංසදයේ උපසභාපතිනී රෝහිණි කවිරත්න මන්ත්‍රීවරිය පවසන්නේ බිම්ෂානි ජාසිංහආරච්චි මහත්මිය සිය රාජකාරිය නිසි ලෙස ඉටුකිරීම නිසා ඇයට හිමි උසස්වීමට එරෙහිව පුරුෂ සමාජය කටයුතු කිරීම ගැන පිළිකුලක් ඇතිවන බවයි.
කෙසේවෙතත් නියෝජ්‍ය පොලිස්පතිනිගේ රැකියාවේ සුරක්ෂිතභාවය වෙනුවෙන් කැප වන බව මෙම සියලුම මන්ත්‍රීවරියන අවධාරණය කරයි.
එමෙන්ම අද (18) කොළඹදී මාධ්‍ය වෙත අදහස් දක්වමින් මහජන ආරක්ෂක අමාත්‍ය සරත් වීරසේකර මහතා සඳහන් කරන්නේ ප්‍රථම කාන්තා නියෝජ්‍ය පොලිස්පතිනියට එරෙහිව අධිකරණට පෙත්සමක් ඉදිරිපත් කිරීම ගැන කණගාටු වන අතර එවැනි පත්වීමක් අපට ආඩම්බරයක් ද වන බවයි.
එමෙන්ම එම පෙත්සම පරාජය වනු ඇති බවද ඔහු කියාසිටියි.
