සෞඛ්‍ය අමාත්‍යාංශයේ ඇතැම් නිලධාරීන්ගේ ක්‍රියාකලාපය හේතුවෙන් කොවිඩ් එන්නත්කරණ වැඩසටහන අවුල් ජාලයක් වී ඇති බව කොවිඩ් පාලන රාජ්‍ය අමාත්‍ය සුදර්ශනී ප්‍රනාන්දුපුල්ලේ මහත්මිය ඊයේ (24) පවසන ලදි.
කොවිඩ් පාලනය පිළිබඳ අමාත්‍යවරිය ලෙස එහි වගකීම තමන්ට පවරා ඇතත් සෞඛ්‍ය අමාත්‍යාංශයේ පවත්වන ඇතැම් රැස්වීම් වලට තමන්ව සහභාගී කර නොගන්නා අතර ඒවායේ තීන්දු තීරණ පිළිබඳව තමනුත් නොදන්නා තත්වයක් උද්ගතව ඇති බවයි ඒ මහත්මිය ඊයේ පැවති මාධ්‍ය හමුවකදී ප්‍රකාශ කළේ.
“ඇත්තටම තාක්ෂණික කමිටුවෙන් තීන්දු කරපු දේවල් තියෙනවා. ජනාධිපති කාර්ය සාධක බලකායට අතිගරු ජනාධිපතිතුමා දීපු උපදෙස් තියෙනවා. ඒවා තියෙද්දි සමහරවිට රෑට කතා කරලා කියනවා හෙට වැක්සිනේශන් පටන් ගන්න කියලා.
එහෙම එන්නත්කරණය කරන්න බැහැ. හදිසියේ කෝල් එකකින් සමහර තීන්දු වෙනස් වෙලා තියෙනවා. එන්නත්කරණය පිළිබඳව මාර්ගෝපදේශයක් දෙන්න ඕනා. දැන් එහෙම තමයි සෞඛ්‍ය අමාත්‍යාංශය මෙච්චර කල් දේවල් කෙරුවෙ. හැබැයි දැන් අපි එහෙම ඒවා දකින්නෙ නැහැ. හදිසියේ වයස් කාණ්ඩය වෙනස් වෙනවා. ඉතින් එතන ගැටළුවක් තියෙනවා“
ප්‍රශ්නය – කාටද ඔබතුමිය චෝදනා කරන්නෙ ? කවුද එහෙම කෝල් කරන්නෙ ?
“සෞඛ්‍ය අමාත්‍යාංශයේ ඉහළ නිලධාරීන්. ඉතිං එහෙම ඒ එතකොට සෞඛ්‍ය අමාත්‍යාංශය මට මේ කොවිඩ් පාලන වගකීම දීලා තිබුණාට තියෙන සමහර රැස්වීම් අපි දන්නෙ නෑ. ගන්න තීන්දු ගැන දන්නෙ නෑ“
“එන්නත්කරණය වෙනුවෙන් සෞඛ්‍ය නිලධාරීන්ට උපදේශන මාලාවක් නිකුත් කරන්න ඕන. මේ දක්වා එහෙම උපදේශන මාලාවක් නිකුත් කරලා නැහැ. එන්නත්කරණය සිදුකරන ප්‍රදේශ හෝ ග්‍රාම නිලධාරී වසම්වල සිටින සෞඛ්‍ය බලධාරීන්ට ඒ ගැන දැනුවත් කරලා ඔවුන්ව ඊට සුදානම් සිදුකරන්න ඕන. ඒ ඒ ප්‍රදේශවල සිටින ජනතාවට දැනුම් දෙන්න අවශ්‍යයි එන්නත ලබා ගන්න එන්න කියලා. ස්ථාන වෙන් කරන්න අවශ්‍යයි. ඒ වගේම එන්නත ලබාදුන්නාට පස්සේ ඔවුන්ට සංකුලතා ඇති වනවාද කියා සොයා බලන්න අවශ්‍යයි.
මහජන සෞඛ්‍ය ගැන අවබෝධයක් නැති සෞඛ්‍ය අමාත්‍යාංශයේ ඉහළ නිලධාරීන්ගේ ක්‍රියා කළාපය මේකට හේතුවක්. සන්නිවේදන ගැටළු නිසා යම් පැටලිලි ස්වභාවයක් දක්නට ලැබෙනවා. ඒවා වෙනස් කර ගන්න අවශ්‍යයි“
