ආනයනික සීනි සඳහා බදු අඩු කිරීම තුළින් රජයට කිසිදු පාඩුවක් සිදුව නොමැති බව මුදල් අමාත්‍යාංශය පවසයි.
මුදල් අමාත්‍යාංශ ලේකම් එස්.ආර් ආටිගල මහතා පෙන්වාදෙන්නේ සීනි සඳහා පනවා තිබූ ආනයනික බදු අඩු කිරීමේ වාසිය මේ වන විට ජනතාවට ලැබී ඇති බවයි.
මේ පිළිබඳ වැඩිදුරටත් අදහස් දැක්වු ඒ මහතා,
“කාටහරි ගණනය කරන්න පුළුවන් ඔක්තෝබර් 13 ඉදලා පෙබරවාරි මාසයේ 10ට ආනයනය කරපු සීනි ප්‍රමාණයේ යම්කිසි ගානක් තියෙනවා. ඒකට රු 49.75 කිලෝවකට අපිට ලැබෙන්නේ නෑ ආදයම. ඒකෙන් කියන්නේ නෑ ආදායම් ලොස් එකක් කියලා. ඒක තමයි ප්‍රතිපත්තිය. ඒ අනුව රු බි 15.9ක් හැබැයි පෙබරවාරි 10 ඉදලා මාර්තු 10ප වෙනකොට තවත් මෙට්‍රික් ටොන් 60,000ක් ගෙනාවා. එතකොට පාඩුව අර රු 49.75 වැඩි කිරීම 60ත් එකතු කරන්න ඕනේ. ඒ කියන එක්කෙනා මේක ශත 25ට තිබුණානම් එදා වෙනකල්ම පාඩුයි. හැබැයි එදා අපි ඔක්තෝබර් 13 සීනි ශත 25 කරන කොට සිල්ලර මිල තිබුණේ රු 135 -140ට. එදා TIF අගය කියන එක රු 72ක්. බදු එක්ක එකතු වුණාම රු 121ක් වුණා. TIF අගය අද වෙනකොට රු 90ක්. ඒ ප්‍රතිලාභය ක්‍රමානකූලව ජනතාවට ඇවිල්ලා තියෙනවා. ඒක තේරුම් ගන්නේ නැති එක්කෙනා තමයි කියන්නේ මේක ලොස් කියලා.“
ආනයනික සීනි කිලෝග්‍රෑම් එකක් සඳහා රුපියල් 50 ක්ව පැවති බද්ද පසුගිය වසරේ ඔක්තෝබර් 13 වන දින සිට ශත 25 දක්වා අඩු කිරීමට රජය පියවර ගන්න ලදි.
අදාළ බදු අඩු කිරීම තුළින් රුපියල් බිලියන 15 යි දශම 9 ක අලාභයක් රජයට සිදුවී ඇති බවට මේ වන විට විවිධ පාර්ශව විසින් චෝදනා කර සිටියි.
අදාළ චෝදනාව සිදුකරමින් ජනතා විමුක්ති පෙරමුණේ හිටපු පාර්ලිමේන්තු මන්ත්‍රී සුනිල් හඳුන්නෙත්ති මහතා අද (12) දිනයේ ශ්‍රේෂ්ඨාධිකරණයට පෙත්සමක්ද ගොනුකරනු ලැබීය.
