රජය විසින් ජලාශ ඉදිකර, ඒවා අවට ඉඩම් ජනතාවගේ ප්රයෝජනය වෙනුවෙන් සංවර්ධනය කිරීමට උත්සාහ ගන්නා විට පරිසරවේදී රාජ්ය නොවන සංවිධාන මුදල් ලබාදී ඊට එරෙහිව ජනතාව උසිගන්වන බව වාරිමාර්ග අමාත්ය හා ආරක්ෂක රාජ්ය අමාත්ය චමල් රාජපක්ෂ මහතා පවසයි.
ඒ මහතා මේ බව පැවසුවේ දැදුරුඔය ජලාශය ආශ්රිත විදුලි බලාගාරය විවෘත කිරීමේ අවස්ථාවට ඊයේ (01) එක්වෙමින්.
මෙහිදී වැඩිදුරටත් අදහස් දැක්වූ අමාත්යවරයා,
“මහින්ද චින්තනයේ තිබිච්ච ඒ ජලාශ වලින් රඹකැන් ඔය ජලාශය අපි හැදුවා අම්පාර දිස්ත්රික්කයේ. දැන් එතන ඉඩම් තියෙනවා, ඉඩම් සංවර්ධනය කරන්න ඕනෙ.
එතකොට ආපහු පරිසරයෙන් කියනවා – පරිසරවේදීන් කියන්නෙ. රාජ්ය නොවන සංවිධාන. මම දැන් හුඟක් සොයාගෙන තිබෙනවා කවුද මේ රාජ්ය නොවන සංවිධාන, කොහෙන්ද මුදල් ලැබෙන්නෙ, එයාලාගෙ පරමාර්ථය මොකක්ද කියන එක ගැන. ඒ අය සල්ලි දීලා උසි ගන්වනවා.
එතකොට වැවක් හදලා ඉඩම් සංවර්ධනය කරන්නෙ නැත්නම්, ඒ ඉඩම් ජනතාවගේ ප්රයෝජනය සඳහා ගන්නෙ නැත්නම් ඒකෙ ඇති වැඩකුත් නෑ”