විදෙස් රැකියාවල නියුතු ශ්රී ලාංකිකයන් හට පූර්ණ විද්යුත් වාහන බලපත්ර ලබා දීමේ යෝජනා ක්රමයේ කිසිදු විනිවිඳභාවයක් නොමැති බව මුදල් පිළිබඳ කාරක සභාව පවසනවා.
ඒ, සම්බන්ධයෙන් පූර්ණ විශ්ලේෂණයක් සිදුකර සති දෙකක් තුළ වාර්තාවක් ලබාදෙන ලෙස රජයේ මුදල් පිළිබඳ කාරක සභාවේ සභාපති හර්ෂ ද සිල්වා මහතා අදාළ නිලධාරීන්ට උපදෙස් දී තිබෙනවා.
ඔහු සඳහන් කර ඇත්තේ එම විශ්ලේෂණය ලැබෙන තුරු බලපත්ර ලබාදීමේ කාලය දීර්ඝ කරන අදාළ ගැසට්පත්රයට අනුමැතිය ලබා දීමට හැකියාවක් නොමැති බවයි.
මෙම ක්රියාවලිය ආරම්භයේ සිට වාහන ගෙන්වන ලද පුද්ගලයන් ඇතුළු අදාළ සියලු තොරතුරු ලබා දෙන ලෙස කාරක සභාව ඉල්ලීම් කර තිබුණ ද නීතිපතිවරයාගෙන් විමසීමකින් තොරව එම තොරතුරු ලබාදිය නොහැකි බවට මුදල් අමාත්යංශය දැනුම් දී ඇති බව වාර්තා වෙනවා.
එමෙන්ම, මෙම බදු සහනය මඟින් රුපියල් මිලියන100 සිට වාහන ගෙන්වා ඇති බවට අනාවරණය වී තිබෙනවා.
මේ අතර, පාර්ලිමේන්තුවේ සන්නිවේදන දෙපාර්තමේන්තුව පැවසුවේ බොහෝ සාමාන්ය රැකියාවල නිරත ශ්රමිකයන් මෙතරම් වටිනාකමක් සහිත වාහන ගෙන්වා ඇත්දැයි සැකයක් මතුවන බවද කාරක සභාවේදී සාකච්ඡාට ගැනුණු බවයි.
මේ වන විට බලපත්ර 1,019 ක් ලබා දී ඇති බවත් අමෙරිකානු ඩොලර් මිලියන 109.8ක් මේ හරහා ප්රේෂණ ලෙස ලැබී ඇති බවත් අනාවරණය වී තිබෙනවා.
එමෙන්ම මෙතෙක් ලබාදී ඇති වාහන බලපත්රවල වටිනාකම ඩොලර් මිලියන 46ක් බව අදාළ නිලධාරීන් සඳහන් කර තිබුණා.
මුදල් කාරක සභාව තවදුරටත් අවධාරණය කර ඇත්තේ වාහන ආනයනය තහනම් කර ඇති පසුබිමක දැනට වාහන ආනයනය සඳහා පවතින එකම අවස්ථාව මෙය වන බැවින් අක්රමිකතා සිදුවීමට ඉඩ නොතැබිය යුතු බවයි.