අමාත්‍ය ජොන්ස්ටන් ප්‍රනාන්දුට විරෝධය පළ කරමින් පසුගිය දින කීපයේම අවස්ථා කිහිපයකදී කුරුණෑගල නගරයේ විටින් විට තරුණ පිරිස් විරෝධතාවල නිරත විය.
ඊයේ දිනයේ ජොන්ස්ටන් ප්‍රනාන්දු අමාත්‍ය වරයාගේ කාර්යාලයේ සිදුවූවායැයි කියන රැස්වීමකදී පළවූ අදහස් පිළිබඳව ඇමතිවරයා අධ්‍යාපනය ලැබූ පාසල වන කුරුණෑගල ශාන්ත ආනා විද්‍යාලයේ ජේෂ්ඨ ආදි සිසුන් පිරිසකගේ විශේෂ අවධානය යොමු වී ඇත.
මෙම විරෝධතා සඳහා සම්බන්ධ වී සිටින තරුණ පිරිස අතරින් බහුතරයක් දෙනා සාන්ත ආනා විදුහලේ ආදි සිසුන් බවත් ඉදිරියේදී විදුහලේම ආදි සිසුන් දෙපිරිසක් අතර බරපතළ ගැටුම්කාරී තත්වයක් නිර්මාණය විය හැකි බව මොවුන්ගේ විශේෂ අවධානයට යොමු වී ඇත.
එබැවින් කුරුණෑගල පදවියේ රදගුරු හිමිපාණන් සහ ශාන්ත ආනා විද්‍යාලයේ විදුහල්පති පියතුමන් සමග සාකච්ඡා කිරීමටත් මේ පිළිබඳව යම් මැදිහත්වීමක් සිදු කරන ලෙසට කොළඹ අගරදගුරු අතිඋතුම් මැල්කම් කාදිනල් රංජිත් හිමිපාණන්ගෙන් ඉල්ලීමක් කිරීමට ද මෙම සාකච්ඡාවේදී ජේෂ්ඨ ආදි සිසුන් තීරණය කර ඇත.
ඔවුන්ගේ මෙම සාකච්ඡාවේදී බරපතළ අවධානයට ලක්ව ඇති කරුණක් වන්නේ ජොන්ස්ටන් ප්‍රනාන්දු අමාත්‍යවරයාගේ ලේකම්වරයෙකු ලෙස කටයුතු කරන්නේ පාසලේ ආදි ශිෂ්‍ය සංගමයේ ලේකම්වරයායි.
මෙම තත්ත්වය වසර 155 ක අභිමානවත් ඉතිහාසයකට උරුමකම් කියන සාන්ත ආනා විදුහලේ කීර්තිනාමයට බරපතළ අපකීර්තියක් මෙන්ම ගෞරවයට හානියක් සිදුවිය හැකි බැවින් වහාම මේ සඳහා ගත හැකි සුදුසුම පියවර ගත යුතු බවටද තීරණය වී ඇත.
