කාබනික වී කිලෝවක් රුපියල් 100 කට මිලදී ගැනීමට රජය සූදානම් බව කෘෂිකර්ම අමාත්‍ය මහින්දානන්ද අලු‍ත්ගමගේ මහතා පවසනවා.
ඒ, කෘෂිකර්ම අමාත්‍යාංශයේදී මාධ්‍යට විශේෂ ප්‍රකාශයක් කරමින්.
මේ වන විටත් නාඩු වී කිලෝව රුපියල් 80ක් ද සම්බා වී කිලෝව රු.100ක් හා කිරී සම්බා වී කිලෝව රු.125කට මිලදී ගැනීමට ව්‍යාපාරකයින් පෙළඹි සිටින බවයි ඔහු පෙන්වා දෙන්නේ.
මේ වනවිට රටපුරා සිදුවන උද්ඝෝෂණ වලට සැබෑ ගොවීන් සහභාගී නොවන බවත් ඒවායේ සිටින්නේ ව්‍යාජ පුද්ගලයන් බවත් ඔහු පවසනවා. හොඳ මිලක් ගෙවා ගොවීන්ගේ නිෂ්පාදන මිල දී ගන්නවා සේම කාබනික වගාවෙන් පාඩුවක් වුණොත් එහි වන්දිය ගෙවීමට රජය සූදානමින් සිටින බවත් ඔහු අවධාරණය කර සිටිනවා.
වී කිලෝවකට පළමු වරට රුපියල් අසූවක් ලැබුනේ තමා අමාත්‍ය ධූරය භාරගැනීමෙන් පසුව බවත් එය තමාගේ රූපයට සමාන පඹයන් පුච්චන ගොවීන්ට අමතක වී තිබෙන බවත් ඔහු පවසනවා.
රජය ලබාදෙන මෙම සහතිකය ගැන විශ්වාසය තබා වහාම ගොවිතැනට යොමු වන්නැයි ගොවීන්ගෙන් ඉල්ලා සිටින බවයි ඔහු වැඩිදුරටත් පවසන්නේ.
මේ අතර, ඇතැම් ප්‍රදේශවල ගොවින් පොහොර අපෙක්ෂාවෙන් සිය වගා කටයුතුද මේ වනවිට ආරම්භ කර තිබෙන පසුබිමක දිවයිනේ ප්‍රදේශ රැසක පොහොර ඉල්ලා ගොවි උද්ඝෝෂණ සංවිධාන කර තිබුණා.
පොහොර අර්බුදය සහ බඩු ඉහල යාමට එරෙහිව හගුරන්කෙත ප්‍රාදේශීය සභාව ඉදිරිපිට සමගිජන බලවේගයේ මන්ත්‍රීවරයෙක් විරෝධතාවයක් පැවැත් වූ අතර අනතුරුව ප්‍රාදේශීය සභා වාරයේදී ඔවුන් විශේෂ ප්‍රකාශයක් කිරීමට උත්සාහ කිරීමේදී උණුසුම් තත්ත්වයක්ද හටගත්තා.
මේ අතර, පොහොර ගැටලු‍ව සම්බන්ධයෙන් විමසීම සඳහා භික්ෂු සංවිධාන කිහිපයක නියෝජිතයින් අද පෙරවරුවේ කෘෂිකර්ම අමාත්‍යාංශයේදී විෂය භාර අමාත්‍ය මහින්දානන්ද අලු‍ත්ගමගේ හමුවුණා.
එම අවස්ථාවට නව සිංහල රාවය සංවිධානයේ මහ ලේකම් පූජ්‍ය මාගල්කන්දේ සුදත්ත හිමියන්, රාවණ බලය සංවිධානයේ මහලේකම් පූජ්‍ය ඉත්තෑකන්දේ සද්ධාතිස්ස හිමියන්, සිංහලේ සංවිධානයේ මහ ලේකම් පූජ්‍ය මැඩිල්ලේ පඤ්ඤාලෝක හිමියන් ඇතුළු පිරිසක් එක්ව සිටියා.
පසුව එම නියෝජිතයින් රාජ්‍ය අමාත්‍ය ශෂීන්ද්‍ර රාජපක්ෂ මහතා ද හමුවුණා.
