හංවැල්ල තුම්මෝදර කොඩිකන්ද ආරණ්‍ය සේනාසනාධිපති උඩුවිල ධම්මසිරි හිමියන් ඝාතනය කර දේහය කොටදෙණියාව නාවාන සොහොන් පිටියේ පුළුස්සා දමා තිබියදී ඊයේ සවස පොලිසිය විසින් සොයා ගැනුනා.
සන්නද්ධ පිරිසක් විසින් පැහැරගෙන ගිය 65 හැවිරිදි ධම්මසිරි හිමියන්ගේ සිරු මළ සිරුරක් වළදමා තිබූ ස්ථානයක පෙට්‍රල් දමා පුළුස්සා දමා තිබෙනවා.
මෙම සිද්ධිය සම්බන්ධයෙන් විමර්ශනය කෙරෙන මිරිහාන විශේෂ අපරාධ මෙහෙයුම් ඒකකය සහ හංවැල්ල පොලිසිය සැකපිට පුද්ගලයන් දෙදෙනකු අත්අඩංගුවට ගෙන තිබෙනවා.
එමෙන්ම ඊයේ පෙරවරුවේ පුද්ගලයකු මෙම සිද්ධිය සම්බන්ධයෙන් හංවැල්ල පොලිසියට භාරවී තිබුණා.
පොලිසිය පවසන අන්දමට ධම්මසිරි හිමියන් ඉකුත් 31 වෙනිදා රාත්‍රී 11.30 ට පමණ සන්නද්ධ කණ්ඩායම විසින් පැහැරගෙන ගොස් තිබෙනවා.
වෑන් රථයකින් පැමිණි දස දෙනෙකුගෙන් පමණ සමන්විත වූ සන්නද්ධ පිරිසක් ආරණ්‍ය සේනාසනයේ වැඩ විසූ ධම්මසිරි හිමියන්ට අමානුෂික ලෙස පහරදී පැහැරගෙන ගොස් ඇති බවටයි වාර්තා වන්නේ.
මෙම පැහැර ගැනීම සිදුවන අවස්ථාවේ ආරණ්‍ය සේනාසනයේ ගිහි පුද්ගලයන් දෙදෙනකුද සිට ඇති අතර සිදුවීමෙන් ඔවුන්ට කිසිදු හානියක් සිදුව නැහැ.
කොඩිකන්ද ආරණ්‍ය සේනාසනයේ වැඩ විසූ සාමණේර භික්‍ෂුවක් සහ උඩුවිල ධම්මසිරි හිමියන් අතර ආරවුලක් පැවැති බවත් එම ආරවුලේ ප්‍රතිපලයක් ලෙස මෙම ඝාතනය සිදුවන්නට ඇති බවත් පොලිසිය සැක පල කරනවා.
වැඩිදුර කියන්න
