65 හැවිරිදි හංවැල්ල තුම්මෝදර කොඩිකන්ද ආරණ්‍ය සේනාසනාධිපති උඩුවිල ධම්මසිරි හිමියන් ඝාතනය කර සොහොන් පිටියේදී පුළුස්සා දමා තිබියදී ඊයේ (04) පොලීසිය විසින් සොයා ගැනුනා.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පවසන්නේ සිදුවීම සම්බන්දයෙන් මේ වන විට පුද්ගලයින් 4 දෙනෙකු අත්අඩංගුවට ගෙන ඇති බවයි.
වෑන් රථයකින් පැමිණි දස දෙනෙකුගෙන් පමණ සමන්විත වූ සන්නද්ධ පිරිසක් ආරණ්‍ය සේනාසනයේ වැඩ විසූ ධම්මසිරි හිමියන්ට අමානුෂික ලෙස පහරදී පැහැරගෙන ගොස් තිබූ අතර එම අවස්ථාවේදී ගිහි පුද්ගලයින් දෙදෙනෙක්ද ආරණ්‍යයේ සිට ඇති බව තොරතුරු වාර්තා වනවා..
මෙම පැහැර ගැනීමේ සිදුවීමට අදාලව විහාරස්ථානයේ වැඩවෙසෙන 15 හැවිරිදි සාමනේර හිමිනමක් පිළිබදව මේ වන විට තොරතුරු අනාවරණය වී තිබෙනවා.
හොරණ ප්‍රදේශයේ සිට පැවිදි බිමට පැමිණි මෙම සාමණේර හිමිනම කොඩිකන්ද ආරණ්‍ය සේනාසනයේ වසර කිහිපයක් තිස්සේ වැඩ වාසය කරනවා.
මෙම සාමණේර හිමිනම ආරණ්‍ය සේනාසනයේදී නිතර අපයෝජනයට ලක්වූ බව විමර්ශනවලිදී හෙළිවී ඇති අතර උන්වහන්සේ මෙම සිදුවීම් ජායාරූප සහ වීඩියෝ ගත කර තම මවට ලබාදීමට කටයුතු කර තිබුණා.
පොලීසිය සැක පලකරන්නේ තම දරුවාට අත්වන අතවරයන් ගැන දැඩි ලෙස කෝපයට පත්වූ මව කිසියම් පිරිසක් වෙත ලබාදුන් කොන්ත‍්‍රාත්තුවක් මත ධම්මසිරි හිමියන් පැහැර ගන්නට ඇති බවටයි.
මෙම සිද්ධිය සම්බන්ධයෙන් හංවැල්ල පොලිසිය වෙත භාරවී ඇති පුද්ගලයා සාමණේර හිමි නමගේ පියා බවයි පොලිස් ආරංචි මාර්ග පවසන්නේ.
ධම්මසිරි හිමියන් පැහැරගත් සන්නද්ධ පිරිස සමග සාමණේර හිමියන්ගේ මවද ආරණ්‍ය සේනාසනයට පැමිණ ඇති බවට තොරතුරු ලැබී ඇතැයි පොලිසිය පවසනවා.
සිද්ධිය සම්බන්ධයෙන් හංවැල්ල පොලීසිය වැඩිදුර පරීක්ෂණ සිදුකරනවා.
වැඩිදුර කියන්න
