හංවැල්ල රජයේ තානායමේ ගල් බංකුවක් මත තිබී ගිනිගත් පුද්ගල මෘත දේහයක් හමුවී තිබෙනවා.
තානායමේ කාමරයක් ඉදිරිපිට කොස්ගසක් යට ඇති ගල්බංකුවක් මත තිබූ මෙම පුද්ගල මෘත දේහය අද (10) උදෑසන හමුවූ බව හංවැල්ල පොලීසිය පවසනවා.
මෙලෙස මියගොස් ඇත්තේ නුගේගොඩ මිරිහාන සාලාව පාර ප්‍රාදේශයේ පදිංචි 70 හැවිරිදි පුද්ගලයකු බවයි වාර්තා වන්නේ.
ඊයේ (09) සවස 4 ට පමණ හංවැල්ල තානායමට පැමිණි මෙම පුද්ගලයා කාමරයකට මුදල් ගෙවා එහි රාත්‍රිය ගතකර තිබෙනවා.
කෙසේවෙතත් රාත්‍රි කාලයේ ඔහු සිය කාමරය ඉදිරිපස ඇති ගල්බංකුවක් මතට වී ඔහුත් සමග පැමිණි කුලී රථ රියදුරා සමග රාත්‍රී 11 වන තෙක්
මත්පැන් පානය කළ බව තානායමේ බලධාරීන් පවසනවා.
ඉන් අනතුරුව අද උදෑසන ඔහුගේ පිළිස්සුණු දේහය හමුවූ බවයි තානායමේ පාලනාධිකාරිය සදහන් කරන්නේ.
හංවැල්ල රජයේ තානායම ඕලන්ද බලකොටුවක් ලෙස පවත්වාගෙන ගිය ස්ථානයක් බවත් මෙම පුද්ගලයා පිළිස්සී සිටි ගල් බංකුව වේල්ස් කුමාරයා ලෙස සැලකෙන හත්වන එඩ්වඩ් රජු මෙම බලකොටුවට පැමිණි අවස්ථාවල වාඩි වී කැළණි ගගේ සිරි නැරඹූ පුරාවිද්‍යාත්මක වටිනාකමකින් යුත් ගල් බංකුවක් බවට විශ්වාස කරන බවත් තානායමේ පාලනාධිකාරිය සදහන් කරනවා.
