ජැපනිස් එන්සෙපලයිටීස් හෙවත් මොළේ උණ රෝගය හේතුවෙන් යාපනයේදී දෙවන රෝගියාද ඊයේ (30) මියගොස් තිබෙනවා.
මෙලෙස මියගොස් ඇත්තේ යාපනයේ ආවරංගල් ප්‍රදේශයේ පදිංචිව සිටි ජයචන්ද්‍රන් සස්මිකා නමැති පස් හැවිරිදි දැරියක්.
උණ රෝගයෙන් පෙළෙමින් සිටි ඇයට ප්‍රතිකාර අවස්ථා කීපයකදී ලබා දුන්නද සුව නොවීම නිසා යාපනයේ අච්චුවේලී රෝහලේ දැරියව නතර කිරීමට ගෙන යමින් සිටියදී මෙසේ ඇය මිය ගොස් තිබෙනවා.
එහිදී අදාළ දැරියගේ පශ්චාත් මරණ පරීක්ෂණ සිදු කර ඇති අතර ඇයගේ මරණයට හේතුව මොළයේ උණ රෝගයක් බවට අනාවරණ වී තිබෙනවා.
පසුගිය සතියේදී යාපනය ශීක්ෂණ රෝහලට උණ රෝගය නිසා ඇතුළත් කළ රෝගියෙකු මියගිය අතර එම රෝගියා මියයාමට හේතුවද මොලේ උණ රෝගය නිසා බවට තොරතුරු වාර්තා වුණා.
කෙසේ වෙතත් මොළේ උණ රෝගීන් උතුරු පළාතෙන් මෙවර හමු වී ඇත්තේ වසර ගණනාවකට පසුවයි.
පළමු රෝගියා හමු වී රෝගියා මියයාමත් සමගම මොලේ උණ රෝගය පැතිර යාම වැළැක්වීම සම්බන්ධයෙන් උතුරේ සෞඛ්‍ය බලධාරීන් පියවර ගැනීමට සාකච්ඡා පවත්වන අතරවාරයේ මෙසේ යාපනයෙන් දෙවන රෝගියාද මොලේ උණ රෝගය හේතුවෙන් මියගොස් ඇති බවට වාර්තා වනවා.
