ශ්රී ලංකාවේ LGBTQ ප්රජාව වෙනුවෙන් හඬ නගන අයකු ලෙස ප්රකට රොසෑනා ෆ්ලේමර් කල්දේරා මහත්මිය TIME සඟරාවේ 2024 වසර සඳහා වන වඩාත්ම බලපෑම්සහගත පුද්ගලයන් 100 (Time 100) අතරට එක්ව තිබෙනවා.
Time 100 යනු අමෙරිකානු ප්රවෘත්ති සඟරාවක් වන Time විසින් ප්රකාශයට කරන ලොව වඩාත්ම බලපෑම්සහගත පුද්ගලයන් 100 දෙනාගේ ලැයිස්තුවක්.
අමෙරිකානු විද්වතුන්, දේශපාලනඥයන් සහ මාධ්යවේදීන් අතර මතවාදයක් ප්රතිඵලයක් ලෙස 1999 දී ප්රථම වරට ප්රකාශයට පත් කරන ලද මෙම ලැයිස්තුව වර්තමානයේදී වාර්ෂිකව ඉදිරිපත් කෙරෙන අතර එයට ඉතා වැදගත් ලෙස සලකනවා.
රොසෑනා ෆ්ලේමර් කල්දේරා දශක දෙකකට වැඩි කාලයක් ශ්රී ලංකාවේ LGBTQ අයිතිවාසිකම් වෙනුවෙන් පෙනී සිට ඇති අතර ඇයගේ උපදේශනය ගෝලීය වශයෙන් විචක්ෂණශීලී කාන්තාවන්ට විශාල ජයග්රහණයක් ලබා දී තිබෙන බව TIME වාර්තාකරු සන්යා මන්සූර් ඇය සම්බන්ධයෙන් සඟරාවේ සටහන් කර තිබෙනවා.
කාන්තාවන් අතර සමලිංගික සමීපත්වය ශ්රී ලංකාව විසින් තහනම් කිරීමට එරෙහිව එය මානව හිමිකම් උල්ලංඝනය කිරීමක් ලෙස ප්රකාශ කරමින් ඇය පවරන ලද නඩුව සඳහා 2022 දී එක්සත් ජාතීන්ගේ සංවිධානය සුවිශේෂී තීරණයක් ගනිමින් ඇයට සහාය පළකර තිබුණා.
මෙම නඩුව ශ්රී ලංකා දේශපාලනයේ LGBTQ අයිතිවාසිකම් කරළියට ගෙන ආ අතර, එම තීරණයෙන් පසුව නීති සම්පාදකයකු විසින් රට තුළ සමලිංගිකත්වය සාපරාධී නොවන බවට පත්කිරීමේ පනත් කෙටුම්පතක් ඉදිරිපත් කරනු ලැබුවා.
මෙම සංශෝධනයට විරුද්ධ නොවන බව ජනාධිපති රනිල් වික්රමසිංහ පවසා ඇති නමුත් යෝජිත නීතියේ ව්යවස්ථානුකූලභාවය ශ්රේෂ්ඨාධිකරණය හමුවේ අභියෝගයට ලක් කර ඇති බව ටයිම් ලිපියේ සඳහන් වෙනවා.