ඊයේ (04) පැවති Mrs. Srilanka 2020 තරඟාවලියේ අවසන් තරඟයේදී ඇතිවූ ආන්දෝලනාත්මක තත්ත්වයෙන් පසුව සිය කිරුළ අහිමිවූ පුෂ්පිකා ද සිල්වා මහත්මිය සිය ෆේස්බුක් ගිණුමේ සටහනක් පලකර තිබෙනවා.
ඇය පවසන්නේ පෙරදා රාත්‍රියේ සිදුවූ අපහාසාත්මක සිදුවීම තමන්ට ඇතිවූ එක් සිදුවීමක් පමණක් බවත් තමන් තමන් ලෙස තවමත් අභිමානයෙන් සිටින බවත්ය.
අදාල සිදුවීමෙන් තම හිස් කබලට තුවාල සිදුව ඇති බවත් ඒ පිළිබදව තම දරුවා විමසන විට දරාගත නොහැකි වේදනාවක් ඇතිවන බවත් ඇය අදාල සටහනෙහි දක්වා තිබෙනවා.
එමෙන්ම ඇය දික්කසාද වී ඇති කාන්තාවක් නොවන බවත් ඇය දික්කසාද බවට චෝදනා කරන්නේ නම් ඊට අදාල ලියකියවිල් ඉදිරිපත් කරන ලෙසට තමන් අභියෝග කරන බවත් පුෂ්පිකා ද සිල්වා මහත්මිය පවසනවා.
අදාල සිදුවීම හරහා සිදුවූ අසාධාරණය හා අපහාසය වෙනුවෙන් තමන් දැනටමත් නීතිමය ක්‍රියාමාර්ග ගෙන අවසන් බවයි ඇය සටහන් කර ඇත්තේ.
