කටාර් රාජ්‍යයේ පැවැත්වෙන 2022 ලෝක කුසලාන පාපන්දු තරගාවලියේ ඝානා කණ්ඩායම සමග පැවති තරගයේදී දඬුවම් පහරක් සාර්ථක කරගත් සුපිරි පාපන්දු ක්‍රීඩක ක්‍රිස්ටියානෝ රොනාල්ඩෝ නව වාර්තාවක් පිහිටුවන්ට සමත් වුණා.
ඒ ලෝක කුසලාන පාපන්දු තරගාවලි පහක දී ගෝල වාර්තා කළ ලොව එකම පාපන්දු ක්‍රීඩකයා ලෙසින්.
37 හැවිරිදි ක්‍රිස්ටියානෝ රොනල්ඩෝ 2006, 2010, 2014, 2018 සහ 2022 පහ නියෝජනය කළ අතර ඒ සෑම තරගාවලියක දීම ගෝල වාර්තා කිරීමට සමත් වී තිබෙනවා.
මේ අතර ලෝක කුසලාන පාපන්දු තරගාවලියේ පෘතුගාලය සහ ඝානා රාජ්‍යය අතර පැවති තරගය නිමාව දුටුවේ පෘතුගාල කණ්ඩායමට ගෝල 3 – 2 ක ජයග්‍රහණයක් හිමිකර දෙමින්.
කණ්ඩායම් දෙකටම ගෝල නොමැතිව පළමු අර්ධය නිමා වුණා.
තරගයේ 65 වැනි මිනිත්තුවේදී ක්‍රිස්ටියානෝ රොනල්ඩෝ දඬුවම් පහරක් සාර්ථක කරගනිමින් ලබා ගත් ඓතිහාසික ගෝලයත් සමග පෘතුගාලය තරගයේ පෙරමුණ ගත්තා.
Andre Ayew 73 වැනි මිනිත්තුවේදී ගෝලයක් ලබා ගනිමින් ලකුණු තත්ත්වය සම කළේ පෘතුගාල ප්‍රේක්ෂකාගාරය මොහතකට නිහැඬියාවේ ගිල්වමින්.
නමුත් මිනිත්තු 2ක කාල පරාසයක් තුල ගෝල 2ක් ලබා ගනිමින් පෘතුගාලය ඒ නිහඬ බව බිඳහෙලුවා.
Osman Bukhari තරගයේ 89 වැනි මිනිත්තුවේදී පන්දුව තම හිසෙන් පෘතුගාල දැල තුලට යොමු කළේ නාටකීය අවසානයකට මග පාදමින්.
එම පන්දුව ආපසු යොමු කිරීම සඳහා පෘතුගාල දැල් රකින්නා, Diogo Costa පන්දුව බිම තබන අවස්ථාවේ Inaki Williams ඔහු පසුපස සිටින බව දැක තිබුණේ නැහැ.
හීයක වේගයෙන් පන්දුව වෙත සිය පාදය දිග කළ විලියම්ස් උත්සාහ කළේ යළිත් පෘතුගාල දැල ආක්‍රමණය කිරීමටයි.
නමුත් ඒ තීරණාත්මක මොහොතේ ලිස්සා ගිය ඝානා ඉදිරි පෙළ ක්‍රීඩකයාට පන්දුව නිවැරදිව දැල වෙත යොමු කිරීමට නොහැකි වුණා.
ඒ අනුව මෙම තරගය 3 -2 ක් ලෙස ජය ගැනීමට පෘතුගාලය සමත් වුණේ H කාණ්ඩයේ ප්‍රසාද ලකුණු සටහනේ පෙරමුණ ගනිමින්.
පළමු අර්ධය තුල කණ්ඩායම් දෙකටම ගෝල ලබා ගැනීමට අවස්ථාව නොලැබුණත් දෙවන අර්ධය තුල ගෝල 5ක් වාර්තා වීම මෙම තරගයේ විශේෂත්වයක් වුණා.
