උත්සව සමයේදී ත්‍යාග ලබා දෙන බව පවසමින් Cargills FoodCity ආයතනයේ වෙළඳ නාමය යොදාගෙන සිදු කෙරෙන වංචාවක් සම්බන්ධයෙන් තොරතුරු වාර්තා වෙනවා.
ජංගම දුරකථනවලට කෙටි පණිවිඩයක් වශයෙන් මෙම සබැඳිය සංසරණය වන අතර එය click කිරීමෙන් අනතුරුව පෞද්ගලික දත්ත ලබා ගැනීමට හැකි වන අයුරින් එය සකසා තිබෙනවා.
මේ අතර, තම ආයතනයේ වෙළඳ සන්නාමය යොදාගනිමින් හුවමාරු වන මෙම පණිවිඩ සම්බන්ධයෙන් කාගිල්ස් ආයතනය නිවේදනයක් නිකුත් කර තිබෙනවා.
කාගිල්ස් ආයතනය පවසන්නේ Cargills FoodCity / Cargills Online ආයතනය මුදල් හෝ තෑගි පිරිනමන බව පවසා,එම තෑගි ලබා ගැනීමට සබැඳියක් (Link) Click කර පුද්ගලික විස්තර ලබාදෙන ලෙස හෝ සමීක්ෂණයකට සහභාගි වන ලෙස ඉල්ලා සිටින ව්‍යාජ පණිවිඩ සම්බන්ධයෙන් ඔවුන්ගේ අවධානය යොමු වී ඇති බවයි.
එමෙන්ම, එලෙස හුවමාරු වන link මත click නොකරන ලෙස සියළුම පාරිභෝගිකයන්ගෙන් ඉල්ලා සිටින බවද අදාළ නිවේදනයේ සඳහන්.
මේ අතර, උත්සව සමය තුළ ප්‍රසිද්ධ සමාගම්වල සන්නාම භාවිත කරමින් සමාජ මාධ්‍ය යෙදවුම් හරහා පුද්ගලයන්ගේ තොරතුරු ලබාගැනීමේ සිදුවීම් ඉහළ ගොස් ඇති බව ශ්‍රී ලංකා පරිගණක හදිසි ප්‍රතිචාර සංසදය පවසනවා.
එහි ජ්‍යෙෂ්ඨ තොරතුරු ආරක්ෂණ ඉංජිනේරු චාරුක ධම්මපොල මහතා සඳහන් කළේ නොමිලේ ත්‍යාග හිමිවන බවට පවසමින් ජංගම දුරකථනවලට කෙටි පණිවුඩ යොමුකරමින් අදාළ දත්ත ලබාගැනීම සිදුවන බවයි.
මේ වසරේ ජනවාරි සහ පෙබරවාරි මාසවල පමණක් ඒ සම්බන්ධ පැමිණිලි 200කට අධික සංඛ්‍යාවක් ලැබී ඇති බව ජ්‍යෙෂ්ඨ තොරතුරු ආරක්ෂණ ඉංජිනේරු චාරුක ධම්මපොල මහතා තවදුරටත් පෙන්වා දී තිබෙනවා.
කාගිල්ස් ආයතන විසින් නිකුත් කළ නිවේදනය පහතින්,
