මාර්ග සංඥා අසළ මාර්ගයේ සිඟමනේ යෙදෙන යාචකයින්ට මුදල් දීමෙන් වළකින ලෙස පොලීසිය රියදුරන්ගෙන් ඉල්ලා සිටිනවා.
රජයේ ප්‍රවෘත්ති දෙපාර්තමේන්තුවේ පැවැති ප්‍රවෘත්ති සාකච්ඡාවකට එක්වෙමින් නියෝජ්‍ය පොලිස්පති ඉන්දික හපුගොඩ මහතා ඒ බව සඳහන් කළා.
ඔහු තවදුරටත් සඳහන් කළේ සිඟමන් යදින පිරිස් සඳහා මුදල් ලබාදීමෙන් වැළැකී සිටියහොත් ඔවුන් එම ස්ථානයන් වෙත නොපැමිණෙන බවයි.
එහිදී වැඩිදුරටත් අදහස් දැක්වූ නියෝජ්‍ය පොලිස්පති ඉන්දික හපුගොඩ මහතා,
“විශේෂයෙන් මේ යාචකයින් අත් අඩංගුවට අරගෙන පොලිස් ස්ථානයට ගෙනල්ලා මොවුන්ව පුනරුත්ථාපනය කරන්න අපි සැලසුම් සකස් කරගෙන ගියා. ඒ වගේම දිනකට රුපියල් 2500 -3000 දක්වා උපයා ගත හැකි රැකියා ඔවුන්ට ලබා දුන්නා. ඒත් ඔවුන් කියන්නේ සිඟමනේ යෙදිලා දිනකට රුපියල් 15,000ක් 20,000 ක් පමණ උපයනවා, මේක අපිට ප්‍රමාණවත් නැහැ කියලා. එතකොට, සමහර අවස්ථාවලදී මේක යම් කිසි පුද්ගලයෙක් මෙහෙයවලා සිඟමනේ යෙදෙන අය යාචයකයින් බවට පත් කරගන්නවා. මේ යාචකයින්ගේ කුඩා දරුවන්ට සමහර වෙලාවට මත් වෙන්න සිරප් වගේ දේවල් දීලා ඔවුන්ව රැගෙන එනවා. ඒ නිසා ඔවුන් හැමවෙලේම නිදාගෙන ඉන්නේ. ඒ වගේම මත් ද්‍රව්‍ය, මත්පැන්වලට ඇබ්බැහි වූවන් ගොඩක් ඉන්නවා, ඒ නිසා මේ යාචකයින්ට මුදල් දෙන්න එපා”
