යළිත් වරක් පිතිකරුවන් සිය වගකීම පැහැර හැරීම හේතුවෙන් එංගලන්තය සමග කාර්ඩිෆ්හිදී පැවති පළමු T20 තරගයේදී සුපුරුදු පරිදි පරාජය වැළඳ ගන්නට කුසල් ජනිත් ප්රමුඛ සංචාරක ශ්රී ලංකා කණ්ඩායමට සිදුවුණි.
එංගලන්තය ශ්රේණිගත කිරීම් හි අංක 1 පසුවන අතර ශ්රී ලංකාව පසුවන්නේ 8වන ස්ථානයේයි.
එමෙන්ම මෙම තරගයට ශ්රී ලංකාව එක් වුණේ පසුගිය මාර්තු මාසයේ පැවති අවසන් T20 තරගයට ක්රීඩාකළ කණ්ඩායමට වඩා වෙනස්කම් 6ක් සහිතවයි.
තරගයේ කාසිය වාසිය දිනූ කුසල් ජනිත් තීරණය කළේ පළමුව පන්දුවට පහර දීමටයි. නමුත් තරගයේ දෙවන පන්දුවාරයේදීම කිසිදු ලකුණක් රැස්කර ගන්නට මත්තෙන් ආරම්භක පිතිකරු අවිශ්ක ප්රනාන්දුට ක්රීඩාගාරයේ අසුනක් වෙන් කරන්නට සෑම් කරන් සමත් වුණා.
ලකුණු 19ක් ලබා සිටි ධනුෂ්ක ගුණතිලක කඩුලු රකින්නාගේ හිසට ඉහලින් අනවශ්ය පහරක් සඳහා ගත් උත්සාහය කෙළවර වුයේ පහසු උඩපන්දුවක් කඩුලු රැකි ජොස් බට්ලර්ට ලබා දෙමින්. කුසල් මෙන්ඩිස්ට මෙන්ම ධනංජය ද සිල්වාටත් පිතිකරණ වගකීම සහමුලින්ම අමතක වී තිබුණා.
කුසල් ජනිත් පෙරේරා පන්දු 26 කදී ලකුණු 30යි. දසුන් ශානක පන්දු 44කදී ලැබූ ලකුණු 50 යම් ගෞරවනීය ස්ථානයකට ශ්රී ලංකා ලකුණු පුවරුව ඔසවා තැබුවා.
එය T20 තරග රටාව තුල දසුන් ශානකගේ දෙවන අරද ශතකයයි. ඒ අනුව පන්දුවාර 20 අවසානයේ ශ්රී ලංකා ලකුණු පුවරුව 129/7 ක් ලෙස සටහන් වුණා.
ලකුණු 130 ක පහසු ඉලක්කය හඹා යෑමට පිටියට පැමිණි ජේසන් රෝයි සහ ජොස් බට්ලර් ශ්රී ලංකා ක්රීඩකයන්ට හිසරදයක් වෙමින් පිටියේ ස්ථාවර වුණේ ජයග්රහණයේ මාවත පහසුවෙන් විවර කරගනිමින්.
ජේසන් රෝයි ලකුණු 36කට දැවීගිය අතර බට්ලර් නොදැවී ලකුණු 68ක් ලබා ගනිමින් සිය කණ්ඩායම ජයග්රහණය තෙක් සුරැකිව රැගෙන ගියා.
ඒ තවත් පන්දු 17ක් ඉතිරිව තිබියදීයි. පන්දු යැවීමේදී දුෂ්මන්ත චමිර සහ ඉසුරු උදාන එක කඩුල්ල බැගින් දවාගත්තා. වනිඳු හසරංග සිය පන්දුවාර 4 තුල ලබා දුන්නේ ලකුණු 12ක් පමණක් වීම කැපීපෙනුණා.
තරගයේ වීරයා ජොස් බට්ලර්. දෙරට අතර දෙවන තරගය අද(24) පැවැත්වෙනවා. තරග තුනකින් සමන්විත තරගාවලිය 1-0ක් ලෙස එංගලන්තය මේ වනවිට පෙරමුණේ පසුවනවා.