රාජ්‍යයේ සේවයේ නියුතු ගැබිණි මවුවරුන් අද (02) දිනයේ සිට අනිවාර්යෙන්ම සේවයට වාර්තා කළ යුතු බවට රාජ්‍ය සේවා, පළාත් සභා හා පළාත් පාලන අමාත්‍යාංශ ලේකම් ජේ.ජේ රත්නසිරි නියෝග කර තිබෙනවා.
කොවිඩ් එන්නත ලබාගැනීම ගර්භණී මවුවරුන්ටද සුදුසු බව දන්වා ඇති පසුබිමක ඔවුන්ට පමණක් සේවයට වාර්තා නොකිරීමට ඉඩ දීමට නොහැකි බවයි ලේකම්වරයා අවධාරණය කරන්නේ.
ගැබිණි මවුවරුන්ට ද එන්නත් ලබාදීමට සෞඛ්‍ය අමාත්‍යංශය තීරණය කර ඇතැයි මාතෘ හා ළමා සෞඛ්‍ය ඒකකයේ අධ්‍යක්ෂ විශේෂඥ වෛද්‍ය චිත්‍රමාලිද සිල්වා ජූනි 2 පැවති මාධ්‍ය හමුවක දී ප්‍රකාශ කළා. ඒ අනුව, ගැබිණි මවුවරුන්ටද එන්නත්කරණය ඇරඹුණද ඇතිවිය හැකි සංකූලතා සම්බන්ධයෙන් බියවන මවුවරුන් එන්නත ලබාගැනීමෙන් වැළකීමද දැකගත හැකිවනවා.
කෙසේ වෙතත්, එන්නත්කරණය කළ අයටද කොවිඩ් වැළඳීය හැකි ව්බවට ජාත්‍යන්තරය පවා පවසන පසුබිමක මෙන්ම, ගැබිණි මවකට කොවිඩ් වැළඳුනහොත් සංකුලතා ඇතිවීමේ වැඩි අවදානමක් ඇති බවට මෙරට සෞඛ්‍ය අංශ පවසන පසුබිමක ලේකම්වරයාගේ නියෝගය අමානුෂික මුහුණුවරක් පිළිඹිබු කටන බවට චෝදනා එල්ල වී තිබෙනවා.
ඒකාබද්ධ සංවර්ධන නිලධාරී මධ්‍යස්ථානය නිවේදනයක් නිකුත් කරමින් සදහන් කළේ ගර්භණී කාන්තාවන්ගෙන් වැඩි පිරිසක් කොරෝනා එන්නත ලබාගෙන නොමැති බැවින් ඔවුන් සේවයට කැඳවීම අවදානම් බවයි. ඒ පිළිබද අවදානය යොමු කරමින් රාජ්‍ය සේවයේ නිරත ගර්භණී කාන්තාවන් සහ කිරිදෙන මව්වරුන්ට සහනයක් ලබාදෙන ලෙස ඔවුන් රාජ්‍ය පරිපාලන අමාත්‍යාංශ ලේකම්වරයාට ලිපියක් යොමු කරමින් ඉල්ලා තිබෙනවා.
රාජ්‍ය නිලධරයන් බහුතරයක් එන්නත්කරණයට ලක්කර ඇති බැවින් රජයේ කාර්යයන් බිඳවැටිමකින් තොරව සාමාන්‍ය පරිදි පවත්වා ගැනීමට ප්‍රමුඛතාවය ලබා දෙන ලෙස ජනාධිපති ලේකම් පී.බී ජයසුන්දර විසින් පසුගිය 29 වැනිදා ලිඛිත උපදෙස් ලබා දෙනු ලැබුවා.
රාජ්‍ය සේවකයන් අද සිට සාමාන්‍ය පරිදි සේවයට වාර්තා කළ යුතු බව දන්වමින් රාජ්‍ය සේවා, පළාත් සභා හා පළාත් පාලන අමාත්‍යාංශයේ ලේකම් ජේ.ජේ. රත්නසිරි පසුගිය 30 වැනිදා චක්‍රලේඛයක් නිකුත් කළේ ඒ අනුවයි.
