මෙරට එන්නත්කරණ වැඩසටහන වෙනුවෙන් ෆයිසර් එන්නත් මාත්‍රා 76,000ක තොගයක් අද (23) උදෑසන දිවයිනට රැගෙන ආවා.
කටාර් ගුවන් සේවයේ භාණ්ඩ ප්‍රවාහන ගුවන් යානයකින් එම එන්නත් මාත්‍රා තොගය කටුනායක ජාත්‍යාන්තර ගුවන්තොටුපල වෙත රැගෙනවිත් තිබෙනවා.
මේ අතර චීනයේ නිෂ්පාදිත සයිනොෆාම් එන්නත් මාත්‍රා මිලියනයක් හෙට (24) දිනයේ ශ්‍රී ලංකාවට රැගෙන ඒමට නියමිතයි.
මෙරට පිහිටි චීන තානාපති කාර්යාලය සඳහන් කරන්නේ මෙම එන්නත් තොගයට අමතරව තවත් එන්නත් මාත්‍රා මිලියන දෙකක් අගෝස්තු මාසය අවසන්වීමට පෙර මෙරටට ලැබීමට නියමිත බවයි.
සිය ට්විටර් ගිණුමේ සටහනක් තබමින් චීන තානාපති කාර්යාලය සදහන් කරන්නේ මේ වනවිට චීනය විසින් සයිනොෆාම් එන්නත් මාත්‍රා මිලියන 13.98ක් ශ්‍රී ලංකාවට ලබාදී ඇති බවයි.
එය මෙරට එන්නත් කළ යුතු ජනගහනයෙන් 90% ප්‍රතිශතයක් බව චීන තානාපති කාර්යාලය පෙන්වා දෙනවා.
