වෙන්නප්පුව සහකාර පොලිස් අධිකාරී එරික් පෙරේරා මහතාව ස්ථාන මාරුකිරීම සම්බන්ධයෙන් අන්තර්ජාලය ඔස්සේ අනාවරණය වූ ලිපියක් සහ හඬපටයක් පිළිබඳව රාජ්‍ය අමාත්‍ය අරුන්දික ප්‍රනාන්දු මහතා ඊයේ (01) මාධ්‍ය හමුවක් පවත්වමින් පිළිතුරු ලබා දෙන ලදි.
“අතිගරු ජනාධිපතිතුමා බලයට පත්වුණාට පස්සෙ තිබිච්ච පළවෙනි සංවර්ධන කමිටුව මගෙ ආසනේ. මේකෙදි මම කරපු කතාව, ඒ අයව පුනරුත්ථාපනය කරන්න ඕනෙ කියන එක තමා මම කිව්වෙ.
මට එතුමා සම්බන්ධයෙන් පෞද්ගලිකව ප්‍රශ්නයක් නෑ. ප්‍රශ්නෙ එන්නෙ මේ ජනතාව දිගටම කියනවා සමහර වෙලාවට බයිසිකලේ ඇල්ලුවාම ඒකෙන් සල්ලි ගන්නවා, එක පැමිණිල්ලක් තියෙනවා වන්දි ඉල්ලපු නඩුවක් පොලිසියට විරුද්ධව, ඒකට තුවක්කුවක් අතින් දාලාය කියලා, ඊළඟට මේ දහ පාළොස් දෙනෙක්ම ඇවිල්ලා කියනවා කුඩු අතින් දැම්මා කියලා.
මගෙ ලිපියෙ කියන්නෙ මේ නිලධාරීන් ගැන පරීක්ෂණයක් සිදුකර වැරැද්දක් තියෙනවා නම් ඒ නිලධාරියාව මගෙ ස්ථානයෙන් මාරු කරන්නයි කියලායි. මේ නිලධාරීන් එකක්වත් මම මාරු කළේ නෑ”
කෙසේවෙතත් මේ වනවිට එරික් පෙරේරා මහතා ස්ථාන මාරුව පිළිගනිමින් මීගමුව සහකාර පොලිස් අධිකාරී තනතුරෙහි වැඩ බාරගෙන ඇති බවත් ආරංචිමාර්ග කළේය.
