ඇමරිකානු ඩොලර් භාවිතයෙන් ගෙවීම් කළහොත් පමණක් මින් ඉදිරියට විදුලිබල මණ්ඩලයට ඉන්ධන ලබා දීම සිදු කරන බව බලශක්ති අමාත්ය උදය ගම්මන්පිල මහතා පවසනවා.
විදුලිබල මණ්ඩලයේ බලාගාර කිහිපයක් ඉන්ධන නොමැතිවීම හේතුවෙන් පසුගිය සතියේ ඇණහිටි අතර, එය යථා තත්වයට පත්කර ගැනීම සඳහා ඩීසල් මෙට්රික් ටොන් තුන් දහසක් අවස්ථා දෙකකදී ලබාදී ඇති බවත් ඩොලර් නොමැතිව මින් ඉදිරියට ඒ අයුරින් ඉන්ධන ලබාදිය නොහැකි බවත් සඳහන් උදය ගම්මන්පිල මහතා පවසනවා.
විදුලිබල මණ්ඩලයට ලබා දීමට තරම් අවශ්ය ඉන්ධන තොග සංස්ථාව සතුව නොමැති බවත් දැනට තිබෙන ඉන්ධන විදුලිය නිෂ්පාදනයට ලබාදුනහොත් වාහන සඳහා අවශ්ය වන ඉන්ධන අවසන් වනු ඇති බවත් පවසන අමාත්යවරයා වැඩිදුරටත් පවසන්නේ විදුලිබල මණ්ඩලය ඩොලර් ලබාදුනහොත් සතියක පමණ කාලයක් තුල ඉන්ධන ආනයනය කර ලබාදිය හැකි බවයි.
විදුලිබල මණ්ඩලයෙන් රුපියල් කෝටි 920 ක මුදලක් ද , ශ්රී ලංකන් ගුවන් සමාගමෙන් රුපියල් කෝටි 650ක මුදලක් ද ණය වශයෙන් ලැබිය යුතුව ඇති බවත් ඉන්ධන අවශ්ය නම් මුදල් ලබා දෙන ලෙස එම ආයතන දෙකටම කල්තියාම දැනුම් දුන් බවත් ඔහු පවසනවා.
ශ්රී ලංකන් ගුවන් සමාගම ඩොලර් ගෙවීම් සිදුකළ නමුත් විදුලිබල මණ්ඩලය එසේ සිදුකිරීමට අපොහොසත්ව ඇති බවයි ඔහු පෙන්වා දෙන්නේ.