චීනය ඩ්‍රෝන් බලකා තවදුරටත් වර්ධනය කරයි

චීනයේ බුද්ධි තොරතුරු රැස්කිරීමේ ජාලයට සම්බන්ධ නවතම මිනිසුන් රහිත යානය එහි පළමු ගුවන් ගමන සිදු කර ඇති බව එරට රාජ්‍ය මාධ්‍ය වාර්තා කරයි.

චීනයේ Aviation Industry Corporation විසින් වැඩි දියුණු කරන ලද සැහැල්ලු හෙලිකොප්ටරයක් වන AR-500CJ යානය, සමුද්‍රීය සෙවීම් සහ ගලවා ගැනීම වැනි මිලිටරි සහ සිවිල් මෙහෙයුම් සඳහා භාවිතා කළ හැකි බව පැවසේ.

චීනයේ නාවික යාත්‍රා සඳහා විශේෂයෙන් නිර්මාණය කර ඇති AR-500CJ කාර්ය මණ්ඩල රහිත ගුවන් යානා පද්ධතියේ පළමු ගුවන් ගමන චීනයේ නැඟෙනහිර ජියෑන්ග්ෂි පළාතේදී සාර්ථකව සිදු කර ඇති බව සදහන් වේ.

එය ක්‍රියාකාරී සහ කාර්ය සාධන පරීක්ෂණ පියාසැරිවලට භාජනය කිරීමට නියමිත වන අතර 2023 දී තාක්ෂණික ඇගයීමක් සිදු කිරීමට නියමිතයි.

හෙලිකොප්ටර් ඩ්‍රෝන යානයට අමතරව, චීනය විසින් Zhu Hai Yun නම් ලොව ප්‍රථම කෘතිම බුද්ධියෙන් ක්‍රියාත්මක වන ඩ්‍රෝන් මව් නෞකාව ද නිමවා තිබේ.

මීටර් 88 ක් දිග, මීටර් 14 ක් පළල සහ මීටර් 6 ක් ගැඹුරින් ස්වාධීනව ක්‍රියා කළ හැකි Zhu Hai Yun, මිනිසුන් රහිත යාත්‍රාවක් දුරස්ථව හෝ ස්වයංක්‍රීයව විවෘත ජලයේ ගමන් කිරීම පාලනය කළ හැකි අතර ඉලක්ක නිරීක්ෂණය කිරීමේ ජාලයකින් ද සමන්විතය.