ශ්රී ලංකාව සහ ඉන්දියාව අතර ලබන අඟහරුවාදා ආරම්භ වීමට නියමිත සීමිත පන්දුවාර ක්රිකට් තරඟාවලිය කල් දැමෙනු ඇතැයි Cricinfo වෙබ් අඩවිය වාර්තා කරනවා.
ඒ ශ්රී ලංකා කණ්ඩායමේ පුහුණු කාර්ය මණ්ඩල සාමාජිකයන් දෙදෙනෙකුට කොවිඩ් 19 ආසාදිත බව තහවුරු වීම හේතුවෙන්.
මෙලෙස කොවිඩ්19 ආසාදිත බව තහවුරු වූයේ පිතිකරණ පුහුණුකරු, ග්රාන්ට් ෆලවර්ට සහ කණ්ඩායමේ දත්ත විශ්ලේෂක ශිරන්ත නිරෝෂනයි.
ඔවුන්ට ආසාදනය වී ඇත්තේ ඩෙල්ටා ප්රභේදය බව තහවුරු වී තිබෙනවා.
ඔවුන් දෙදෙනා අතරමැදි ප්රතිකාර මධ්යස්ථානයකට යොමු කර ඇති බව සඳහන්.
මෙම තත්ත්වය තුල ශ්රී ලංකා කණ්ඩායමට අමතර දින දෙකක් නිරෝධායනයට ලක්වීමට සිදුවනු ඇති.
එංගලන්ත සංචාරය නිමවා මෙරටට පැමිණි කණ්ඩායමේ නිරෝධායන කාලසීමාව අවසන් වීමට නියමිතව තිබුණේ හෙටයි.
ඒ අනුව ඉන්දීය තරඟාවලිය සඳහා වන ජෛව ආරක්ෂණ බුබුලට කණ්ඩායමට ඇතුලත් වීමට නියමිත වුවද ඔවුන්ට නැවතත් PCR පරීක්ෂණයකට භාජනය වීමට සිදුවනු ඇති.
මෙම තත්ත්වය යටතේ ලබන 13වනදා ආරම්භ වීමට නියමිත එක්දින තරඟාවලිය ජූලි 17 වනදා ආරම්භ වීමට නියමිතයි.
දෙවන හා තෙවන තරඟ පිලිවෙලින් ජූලි 19 සහ 21වනදා පැවැත්වෙනු ඇති.
ඉන්දියාව සහ ශ්රී ලංකාව අතර T20 තරගාවලිය ජූලි 24 වනදා ආරම්භ වනු ඇති.