අද සිට යළිත් විදුලිය කැපෙයි

රජයේ පොරොන්දුව මත දින දෙකක් විදුලි කප්පාදුව සිදු නොකලද අද දිනයේ සිට යළිත් විදුලි කප්පාදුව ආරම්භ කර තිබෙනවා.

ඒ සඳහා ලංකා විදුලි බල මණ්ඩලය සිදුකළ ඉල්ලීමකට මහජන උපයෝගීතා කොමිෂන් සභාව අවසර ලබාදී ඇති බව විදුලි බල මණ්ඩලය පවසනවා.

උදෑසන 8 සිට රාත්‍රී 11 දක්වා කාලය තුළ මෙලෙස විදුලි කප්පාදුව සිදුවන බව ලංකා විදුලි බල මණ්ඩලය සඳහන් කරනවා.

ඒ අනුව E සහ F කලාපවලට පැය 7 මිනිත්තු 30ක කාලයක් විදුලි කප්පාදුවක් සිදුකිරීමට නියමිත අතර P,Q,R,S,T,U,V කලාපවලට පැය 3 කාලයක් විදුලි කප්පාදුව සිදුකිරීමට නියමිතයි.

E කලාපය සඳහා පෙරවරු 8 සිට පස්වරු 1 දක්වාත්, සවස 6 සිට රාත්‍රි 8.30 දක්වාත් විදුලිය කැපීමට සැලසුම් කර තිබෙනවා.

F කලාපය සඳහා පස්වරු 1.00 සිට පස්වරු 6.00 දක්වාත් රාත්‍රි 8.30 සිට රාත්‍රි 11.00 දක්වාත් විදුලිය විසන්ධි කිරීමට නියමිතයි.

T සහ U කලාපවල පෙරවරු 9 සිට පෙරවරු 11 දක්වාත් පස්වරු 5 සිට 6 දක්වා විදුලි කප්පාදුවක් සිදුවන අතර Vසහ W කලාප සඳහා පෙරවරු 11 සිට පස්වරු 1 දක්වාත්, පස්වරු 6 සිට රාත්‍රි 7 දක්වාත් විදුලි කප්පාදුව සිදුකෙරෙනවා.

R සහ S කලාපවලට පස්වරු 1 සිට පස්වරු 3 දක්වාත් රාත්‍රී 7 සිට රාත්‍රි 8 දක්වාත් P සහ Q කලාපවලට පස්වරු 3 සිට පස්වරු 5 දක්වාත් රාත්‍රි 8 සිට රාත්‍රි 9 දක්වාත් විදුලි කප්පාදුවක් සිදුකිරීමට නියමිතයි.

කෙසේවෙතත් කැලණිතිස්ස බලාගාරයට අවශ්‍ය ඉන්ධන තොග ලැබීමත් සමග එහි විදුලි උත්පාදන කටයුතු මේ වන විට ආරම්භ කර ඇති බව විදුලිබල මණ්ඩලය සඳහන් කරනවා.