ගොවි උද්ඝෝෂණ සඳහා ගොවීන් පොළඹවන්නේ, රසායනික පොහොර සමාගම් බවට කෘෂිකර්ම අමාත්‍ය මහින්දානන්ද අලුත්ගමගේ මහතා චෝදනා කර සිටිනවා.
ඒ, පෙරේදා (16) දින අනුරාධුපරයේ පැවති හමුවක් අමතමින්.
ඇතැම් පොහොර විරෝධතා පිටුපස දේශපාලන උවමනාවන් පවතින බවයි අමාත්‍යවරයා පවසන්නේ.
ගොවීන් කෙතරම් ඉල්ලා සිටිය ද ආරම්භ වී ඇති මහ කන්නය සඳහා රසායනික පොහොර ආනයනය කිරීමේ හැකියාවක් නොමැති බවත් ඒ සඳහා අවම වශයනේ මාස දෙකක් ගත වන බවත් අමාත්‍යවරයා අවධාරණය කර සිටිනවා.
“ජේවීපී එකේ නාමල් කරුණාරත්නටත් සල්ලි දෙන්නේ රසායනික පොහොර සමාගම්. ජේවීපී එකට අමතරව ආණ්ඩුවේ ශ්‍රී ලංකා නිදහස් පක්ෂයත් මේකට එකතු වෙලා තියෙනවා. අඩුම මාස 2 ක් යනවා එතතොට මහ කන්නය ඉවරයි. දැන් ගොවියට තියෙන්නේ මේ දීලා තියෙන කාබනික පොහොරත් එක්ක තමන්ගෙ කෘෂිකර්මාන්තය ගෙනියන එක. මේකෙ නිෂ්පාදනය අඩු වුණොත් වන්දිත් දෙනවා කියලා කියනව නම්, ඊට වැඩිය දෙයක් කියන්න නැහැ.
අපි කවුරුත් ගොවියා ගාවට යන්නේ නෑ. අපි දන්නවා මේක අභියෝගයක් අපි ගියාම බැණුම් අහන්න වෙනවා. ඒක නිසා අපි මේකෙන් ඈත්වෙලා ඉන්නවා. අපි ඈත්වුණාම මේකට වෙනත් බාහිර පාර්ශව ගිහින් ගොවියො එකතු කරලා විශාල උද්ඝෝෂණ තියනවා” යැයි ඔහු පවසනවා.
අමාත්‍යාවරයා මෙසේ පැවසුවද අමාත්‍යවරයා විසින් මාධ්‍ය හමුවේ සහතික කළ චීන කාබනික පොහොර මෙරට ප්‍රමිතීන්ට අනුකූල නොවන බව නැවත නැවතත් තහවුරු වී ඇති පසුබිමක ගොවීන්ට කාබනික පොහොරද රසායනික පොහොරද අහිමි වී ගොවීන් දැඩි දුෂ්කරතාවයකට පත්ව ඇති බවයි විද්වතුන් පෙන්වා දෙන්නේ.
